ANG rehiyonal nga partidong politikal nga gimugna ni Presidential daughter Davao City Mayor Sara Duterte-Carpio naghisgut na bahin sa iyang presidential bid sa 2022 elections.
Gibutyag ni Duterte-Carpio, tsirman sa Hugpong ng Pagbabago (HNP), sa usa ka pahayag niadtong Miyerkules, Hunyo 23, nga mga opisyal sa partido naa na karon sa panag-istorya uban sa "highly-placed" nga mga nasudnong opisyal bahin sa eleksiyon sunod tuig.
"I am aware that the officers of Hugpong ng Pagbabago (HNP) are in talks with several highly-placed national officials regarding the 2022 elections," matud sa mayor sa iyang pahayag.
"I am not privy to these discussions, but I was told that the meetings are about my candidacy for the Presidential race in 2022," dugang pa niya.
Matud ni Duterte-Carpio nga siya gipasaligan nga kadtong nalambigit sa panag-istorya morespeto sa iyang desisyon kon mohukom siyang di modagan sa pagka-presidente.
Samtang nagpadayag og pasalamat ang mayor ngadto sa Lakas-Christian Muslim Democrats (CMD) party tungod sa ilang suporta.
Ang HNP namugna niadtong 2018, aron sa pagsuporta sa gobyerno ni President Rodrigo Duterte.
Hagbay nang nanguna ang mayor sa presidential survey binsa kon di mosugot ang iyang amahan nga modagan siya.
Gisulti ni Duterte-Carpio niadtong Lunes, Hunyo 21, 2021, nga ang pagka-presidente di haum alang sa usa ka babaye sama niya.
Sa dihang gipangutana kon duna bay posibilidad nga moapil siya sa PDP-Laban isip guest candidate, ang mayor nagsulti nga wa siyay plano nga moapil sa partido. (Ralph Lawrence G. Llemit)