Nagduda ang mga senador nga dunay mga opisyal sa gobyerno nga nikita sa pagpamaligya’g face shields, kay hangtod karon ang Department of Health (DOH) wa pa makapakita og lig-on nga scientific basis sa paghimong mandatory sa pagsul-ob niini.
Si Senate President Vicente Sotto III niingon nga di kalikayan nga magduda ang mga tawo nga dunay binuang kay ang Pilipinas ra man ang naghimong mandatory sa pagsul-ob og face shields. Matod pa sa nigamit og face shield, “Mora man ko og welder ini.”
Unya, unsa man gyud ang gamit sa face shiled? Tinuod bang makaprotehir ni sa mga tawo batok sa Covid-19? Kon si Cebu City Acting Mayor Mike Rama pay pasultion, igo ra man ning himuon nga headband.
* * *
Ang Estados Unidos sa Amerika, abante kaayo sa natad sa panglawas, wa maghimong mandatory sa pagsul-ob og face shields. Gani sa mga estado sa Amerika nga mayoriya sa katawhan nabakunahan na, wa na gani magsul-ob ang mga tawo og face mask.
Si Senador Panfilo Lacson niingon nga posible nga dunay kurapsyon kay nagyagaw ang mga pamahayag sa gobyerno bahin sa face shields. Pun-an pa sa anomalusong paggasto sa pundo sa social amelioration program, Philippine Health Insurance Corp., DOH, Food and Drug Administration ug uban pa.
Samtang si Senador Francis Pangilinan niingon nga di ikahibung kon dunay mga opisyales sa gobyerno nga nakasapi kay ilang napamatud-an sa hearing sa Senado sa miaging tuig nga dunay mga overpriced testing kits, personal protective equipment (PPEs) ug testing equipment nga naglambigit sa DOH.
* * *
Di na man unta kita maghisgot niining face shields kon nadali pa ang pagbakuna batok sa coronavirus. Si Senador Joel Villanueva niingon nga nag-agwanta intawon ang mga tawo sa pagsul-ob og face shields kay wa pa man makab-ot ang herd immunity.
Niabot na hinuon sa pagpanghulga sa mga tawo nga dakpon kon di magpabakuna. Unsay dakpon? Dunay daghan nga moadto sa vaccination center aron magpabakuna balibaran man kay kinahanglan pang moregister online. Dunay moregister online, inig adto sa vaccination center, wa nay bakuna.
Sigi na hinuon ang pagpalit sa gobyerno og mga bakuna. Kon mabakunahan na ang kadaghanan, di na ta maghisgot pa niining face shields. Ang mga tawo, Mayor Mike, mogamit na sa tinuod nga headband.