Diola: Sukol, dagan, kaging

Fr. Carmelo Diola

Binasi sa Kinaadman 1:13-15; 2:23-24; Salmo 30; 2 Taga-Corinto 8:7, 9, 13-15; Marcos 5:21-43

Atubangan sa peligro ug sa ngil-ad nga panghitabo, adunay tulo ka mga tubag nga mahimong himuon sa tawo. Kon ininglison pa, “fight, flight, freeze”. Mag-agad ang atong tubag sa atong kaagi, naandan, kinaiya, ug, usab, sa kahimtang nga atong giatubang. Kon may tawo nga nagwara-wara og sundang nga padulong kanato, daghan siguro nato ang modagan. Kon maapikihan ug wala nay daganan, mahimong mosukol ug mokaging na lamang. Sa laing bahin, kon moatubang kita og nindot, maayo, ug matahom nga butang ug reyalidad, madani kita. Dawaton nato kini, moduol kita, ug maabri ang atong kahiladman. Lahi atong himuon.

Kahadlok ang nag-atubang sa mga hingtungdan sa ebanghelyo. May duha ka episodio. Ang una mahitungod kang Jairus, usa ka opisyal sa sinagoga, kansang anak nga babaye himalatyon. Ipatapion niya ang kamot ni Jesus aron kini maayo. Nahadlok siya nga mamatay kini. Sa ikaduhang episodio, may babaye nga gitalinug-an sulod sa napulog-duha ka tuig. Nahurot na iyang kabtangan sa pagbayad sa mga mananambal, apan wala gihapon siya maayo. Duha purohan ang iyang kahadlok: nga basig dili siya maayo ug, labaw pa niini, nga basig isalikway siya ni Jesus kay ang pagkatalinug-an makapahugaw sa babaye ug kinahanglan siya magpalayo sa uban.

Taliwala niining mga kahadlok, mingsukol si Jairus ug ang babaye. Nakigharong sila kang Jesus nga nagpakitabang kaniya. Mihangyo si Jairus ug mihikap sa bisti ni Jesus ang babaye. Lain ang tubag sa uban taliwala sa mga kalisdanan. “Mingdagan” ang mga sakop ni Jairus sa dihang namatay ang anak niini ug miingon sila: “Patay na ang imong anak nga babaye; nganong imo pa mang samokon ang Magtutudlo?” Aduna poy mikaging: “Ug pag-abot nila sa balay...nakita niya ang kaguliyang ug paghinilakay og kusog nga pagminatay.”

Wala panumbalinga ni Jesus ang mga babag. Hinunoa, naayo ang babaye ug gipabangon niya ang anak ni Jairus. Pagsukol ang pagtuo batok sa kahadlok ug kamatayon.

Nagkanayon ang libro sa Kinaadman nga “ang Dios wala magmugna sa kamatayon, ug kon ang buhi nga mga binuhat mamatay, dili siya malipay niini.” Kinabuhi ang tumong sa Ginuo: “Gibuhat niya ang tanan aron magpadayon kini ug ang tanang butang nga iyang gibuhat hingpit ug maayo.” Sukwahi diay sa plano sa Ginuo ang kamatayon ug kini misulod sa kasaysayan sa tawo tungod sa sala. Nahimong tawo ang Pulong sa Dios aron pagasugdan ug tapuson ang hingpit nga kaluwasan sa tawo batok sa sala ug kamatayon. Siya ang hingpit nga tambal sa pandemya sa sala ug kamatayon.

Giunsa man pag buhat ni Jesus niini? Sumala ni San Pablo sa 2 Taga-Corinto: “Kay nasayod kamo sa grasya sa atong Ginuong Jesucristo, nga bisan siya dato, nagpapakabos siya tungod kaninyo aron madato kamo pinaagi sa iyang kakabos.” Gihubo ni Jesus ang pagkadayag sa iyang pagka-Dios aron mabatonan niya ang atong pagkatawo. Namatay siya sa krus tungod ug alang kanato. Kini ang gipasabot sa pagtubos ni Jesus.

Dili diay kita angay modagan o mokaging atubangan sa kangil-ad ug kamatayon bisan pag wala kini magpasabot nga magpasaya-saya kita atubangan sa peligro. Dili pod mistil mosukol ginamit lamang ang atong kaugalingong kusog. Anaa si Jesucristo ug siya ang nibuntog sa sala ug sa kamatayon.

Unsa may imong buhaton atubangan sa peligro ug kangil-ad?

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph