DILI basta-basta ang gidangatan sa mga pamilyang Cagas ning bulan sa Hunyo sa dihang tibuok nilang pamilya nabiktima sa Covid-19 nga gikamatay ni Governor Douglas "Dodo" Cagas niadtong Hunyo 10 niining tuiga 2021.
Kining bulan sa Hunyo, abnormal ang function sa mga opisina sa kapitolyo gumikan sa mga ubang empleyado nga nag self-quarantine gumikan sa nahitabo kang Governor Dodo, tungod kay dili kalikayan nga sa matag adlawn'g Lunes moatubang gyud sila ngadto sa governor alang sa paghatud og report ug briefing.
Hangtud karon nagbangutan pa ang tibuok probinsiya sa Davao del Sur, mga mayores, ug mga kapitanes nga gikalitan, ug ingon sa dili makadawat sa makaliton nga pagkawala sa ilang amahan sa lalawigan, labi na nga bisan sa haya na lang wala nila makita ang ilang gobernador.
Ingon ini kasakit ang gidulot sa Covid-19 sa ato, kay kon positibo ka ug mosangko sa kamatayon, papilion ka kon imo bang ipa-cremate o ilubong diretso gikan sa hospital paingon sa sementeryo. Nawala na ang atong daang gawi nga balsamahon ug pila ka adlaw ug semana, aron tambongan ug sud-ongon sa mga paryente nga moabot gikan sa lagyong dapit.
Nakaminus gastos hinuon ang mga tagtungod kay kon sunogon ang patay'ng lawas sa imong paryente, gobyerno man maoy mogasto, apan nawala ang tradisyon sa mga Kristiyanos nga balsamahon ug hayaon bag-o ihatud sa iyang lubnganan nga matud pa's uban nagdugang og gastos ug kasakit sa dughan.
Balik kapitolyo na karong adlawa si Marc Cagas nga mopuli paglingkod sa lingkuranan sa iyang amahan ug siya na ang atong bag-ong gobernador sa probinsiya sa Davao del Sur hangtud sa Hunyo 30, 2022.
Pormal usab nga molingkod sa pagka-vice governor ang iyang ig-agaw, ang senior board member, nga si Atty. John Tracy Cagas. Dili gyud ikalimod nga maayo ang pagdumala ni anhing governor ang probinsiya sa Davao del Sur, ug kon kini ipadayon sa iyang bugtong anak nga si Marc dili sila buhian sa probinsiya tungod sa gibilin sa iyang amahan.
Last term na ni Congresswoman Didi Cagas sa 2022, ang pangutana, kinsa sa mga Cagas ang modagan sa pagka- congressman? Kay kon si Atty. John Tracy, bakante ang pagka-vice governor? Kay si Mayor Josef magpasubli man sa pagka-mayor sa Digos City.
Hayan dili na Cagas ang ka tandem ni Governor Marc ning eleksiyona kon congressman ang daganan ni Vice Governor Atty. John Tracy. Dunay huhungihong diri sa Davao nga dili na modayon pagdagan sa pagka-senador si Atty. Jess Dureza, sa halip modagan daw og congressman sa lone district dinhi sa Davao del Sur, tungod kay taga-Hagonoy, Davao del Sur man ni siya.
Kining tanan pulos pa lang mga plano, unya na nato makita ang plastada human sa filing sa certificate of candidacy karong Octobre 8, 2022. Pero mora'g lisud tumbahon ang mga Cagas basta ipadayon lang sa nahibiling mga Cagas ang LEGACY ni Governor Dodo.