Sa labing unang higayon, nakabaton na gyud og iyang kaugalingong ambulansiya ang Barangay Gaas nga sakop sa lungsod sa Balamban. Ang dako ug hamugaway nga ambulansiya naabot ug giparada sa tugkaran sa Gaas Barangay Hall niadtong Biyernes sa buntag, Hunyo 25. Mga opisyales sa barangay nga gipangulohan ni Kapitan William Genel, mga kawani, BHW, tanod ug mga molupyo madasigon ug puno sa kalipay ang mga dughan nga nisugat sa iyang pag-abot.
“Mao na ni ang katumanan sa dugay na nga gipanamkon nga sakyanan nga moalagad sa katawhan panahon sa emerhensiya,” pasiunang pamahayag ni Kapitan Genel samtang nagsud-ong sa brand new nga ambulansiya. Mahinumduman nga sa nangaging mga adlaw, bulan ug katuigan daghang disgrasya sa kadalanan ug ubang matang sa emerhensiya ang gialarma sa Barangay Gaas. Ang naandang paagi mao ang pagpanawag og tabang sa ambulansiya sa lungsod pagdala sa pasyente sa tambalanan. Dunay mga higayon nga mga sakyanan sa pulis ug pribadong indibidwal ang kargahan tungod sa dinalian nga panginahanglan.
Wala kini malimod sa pagbati ug kaikag sa mga opisyales sa barangay pagtuman sa ilang mandato. Galing lang ang ilang panudlan wala gyud motugot niadtong panahona nga sila makapalit og ambulansiya pagtubag sa bisan unsa nga emerhensiya diin ang mga pasyente nagkinahanglan og dinaliang pagtagad nga madala sa tambalanan.
Nunot sa paglambo sa Barangay Gaas nga nahimong usa sa mga paboritong destinasyon sa mga turista nga gustong mosuroy sa nindot nga kabulakan, sama sa Buwakan ni Alejandra, ang bugnaw nga klima, ang lamian nga pagkaon nga gidalit sa daghang kan-anan, ang matahom nga view babaw sa bungtod lahos sa patag ug kadagatan, ang gabon nga matag karon ug unya mohabol sa palibot diin ang mga motorista mopasiga sa suga sa ilang mga sakyanan nga way kalainan sa mga langyaw nga salida sa sine ug telebisyon, ang haguros sa mga sports car ug dagkong motorsiklo ug labaw sa tanan ang nabaniog na nga pamatasan sa mga molupyo nga hilabihan ka maabiabihon. Pipila lang ni sa mga rason nganong nag-una ang Barangay Gaas sa mga bukirang barangay kon basihan ang paglambo sa turismo, pagpanurok sa mga negosyo sama sa resort, dagko ug gagmay nga kan-anan, imnanan, kapihanan, refreshment parlors, dagko ug gagmay nga swimming pool ug daghan pa.
Mismo ang Provincial Tourism Officer Maria Lester Ybañez nipadayag og kahimuot sa iyang nakita nga mga paningkamot sa barangay pag-ugmad sa turismo sa ilang dapit taliwala sa pandemiya nga atong giantos karon. Gibisita niya ang Barangay Gaas nga puno sa mga pagdayeg, sanglit subra sa katunga sa gidak-on sa barangay ubos sa protected area, apan ang paglambo nahaum gihapon sa gimbut-an sa balaod pagpanalipod sa kalikupan. Ang pagpanalipod sa panglawas pinaagi sa dinalian ug paspas nga pagresponde sa mga nanginahanglan, gipalambo pa karon pinaagi sa pagpanag-iya sa barangay og kaugalingong ambulansiya.