Nitaliwan na sa laing kinabuhi si kanhi Presidente Benigno “Noynoy” Aquino III sa dayong pagsidlak sa adlaw niadtong Hunyo 24, 2021 sa edad nga 61. Bata pa kaayo si PNoy nga namatay. Matod pa lagi sa taga Cabadiangan, mobata ang tawo kon mamatay.
Unsay inyong nahinumdoman ni PNoy? Ginaingon ra ba, “The evil that men do lives after them. The good is oft interred with their bones.” (Mark Antony sa “Julius Caesar” ni William Shakespeare). Apan sa obituary sa New York Times gibutang ang maayo ug dili maayo.
Pananglit, ubos ni PNoy, ang average economic growth sa Pilipinas nilabaw sa 6 porsiyento, usa sa kinakusgan sa Asya. Mibarog siya batok sa China nga gustong hakpon ang tibuok South China Sea. Gisang-at niya ang kaso sa international tribunal sa The Hague nga nihukom nga way sukaranan ang claim sa China, hukom nga wa tahura sa China.
* * *
Sa dayon nang kanaog ni PNoy gikan sa puwesto, ang iyang approval rating anaa sa 57 porsiyento subay sa survey sa Social Weather Stations, ang kinatas-an nga approval rating sa usa ka outgoing president.
Apan gibasol usab sa PNoy sa palpak nga pagtubag sa usa ka hostage-taking sa mga turista gikan sa Hong Kong sakay sa usa ka bus nga misangpot sa kamatayon sa walo ka mga tawo. Gibasol usab siya sa pagkapatay sa 44 ka commandos, ang SAF 44, didto sa Mamasapano, Maguindanao.
Laing giingong palpak ni PNoy mao ang pagtubag sa aftermath sa super typhoon Yolanda nga nilampornas sa Tacloban City ug sa ubang mga lugar sa Eastern Visayas nga nisangpot sa kamatayon sa kapin sa 6,000 ka mga tawo.
* * *
Apan di usab kita makalimot sa mga pasiaw ni PNoy. Kinsay makalimot sa pagkomparar niya sa iyang lovelife ngadto sa usa ka softdrink nga matod pa niya, nagsugod sa Coke regular, ngadto sa Coke Light ug hangtod na gyud sa Coke Zero.
Daghan og gika-date nga mga maanyag nga babaye si PNoy. Apan nagpabilin siya nga ulitawo hangtod sa iyang kamatayon. Mao na nga nagpasiaw siya nga inigkahuman sa iyang termino sa 2016, magpari na lang siya. Wa sab madayon.