BISAN unsa na lang ang diskarte nato karong panahon sa pandemya. Subay sa sugyot sa lokal nga kagamhanan nga "Pagtigom og Kwarta", "Pagsalbar sa Kinabuhi", ug "Pagpundo sa Balay" halos tanan kanato mora na'g mongha aron lagi dili matakdan o makatakod sa gikaintapan nga sakit nga Covid-19.
Apan ang pangutana kung asa kutob kining atong kahimtang? Busa nauso kining "online selling" nga ihatud na lang sa balay ang produkto inay nga mopila ka pa sa grocery stores o palengke.
Hinay-hinay usab nga nangabli ang mga negusyo bisan tuod gipahamtang pa ang kuwarentinas. Busa naaghat kining usa ka grupo sa mga batan-on nga maabli og gamay nga kan-anan diha sa may Barangay Biao sa Tugbok District aron makatabang sa ilang pamilya.
Apan unsang hitaboa nga bag-o pa lang gani sila, gipadal-an na man sila'g "extortion text" gikan sa wa mailhing grupo. Nangayo kini'g P50,000 aron makapadayon ang ilang operasyon nga gikabalaka sa mga batan-on.
Tungod lagi kay dili sila makahatag kay wala pa silay kita og sa ilang pagtuo nga komedya lang, ni-text na usab ang extortionist nga "CGE MADAM KUNG AYAW MUNG SAGOTIN IKAW NA RIN SUMIRA SA USAPAN NATIN CGE WALANG PRUBLIMA ISANG GRANADA LANG KATAPAT NIYAN RESTO BAR." Nagpatabang intawon ang usa sa mga amahan sa batan-on kung tinuod ba nga gibuhat kini sa mga New People's Army (NPA).
Kung mahinumduman mao kini ang paagi sa mga walhong grupo aron makapangalap og sapi alang sa ilang operasyon.
Kaniadto nga wala pay uso ang cellphone, nagpadala sila'g sulat sa mga negusyante aron mangayo og "revolutionary tax" ug kung dili motuman, posible samukon nila ang operasyon sama sa pagsunog sa ekipo o sulungon ang kompaniya niini sama sa nahitabo sa Lapanday Paper Plant sa Mandug ug balay sa mga Lorenzo nga tag-iya sa Lapanday didto sa Pangyan, Calinan sa niaging mga katuigan.
Apan sa paglingkod ni PRody Duterte sugod sa 2016, nihinay na ang ingon niini nga panghitabo tungod sa pursigidong pagpanglutos niya sa kalihukan sa CPP-NPA. Niadtong 2020, nagpagula ang National Task Force to End Local Communist Armed Conflict (NTF-ELCAC) og listahan sa 822 ka "cleared" barangays sa tibuok nasud.
Moabot og 215 ka barangay ang nalista sa Region XI ug naapil dinhi ang daghang barangays sa distrito sa Tugbok ug Calinan.
Busa nakapangutana ko kung NPA ba ang nag-extort kanila? Dili ba kaha kini hinimoan lang sa mga istambay o ordinaryong tulisan? Daghan ra bang grupo nga nisakay sa panahon aron makakuwarta lang.
Busa tambag nako sa mga negusyante nga dili na magpakahilom lamang sa ingon niini nga linuog nga kalihukan. Duol kamo sa inyong mga barangay opisyal kay ilang responsibilidad ang pagseguro nga luwas ang inyong patigayon dinhang dapita.
Manawagan ta sa kapulisan diha sa Tugbok District ubos ni PMaj. Ric Obenza nga aksiyonan kining maong taho. Apil sab ang DILG ug NTF-ELCAC kay basin tuod nasalisihan sila sa mga balhibuong kalag dinhang dapita.
Anaa na kita karon sa kabag-ohan, apil sa usbon ang atong kinaiya sa pagpakahilom lamang bisan kung gitumban na.