DAVAO OCCIDENTAL - Walay kabutangan sa kalipay ni Davao Occidental Congresswoman Lorna Bautista-Bandigan ug ang kinatibuk-ang lumulopyo human nalagdaan ni Pangulong Rodrigo Duterte ang House Bill No. 7321 nga maoy motunhay sa pagtukod sa Davao Occidental General Hospital.
Alang ni Bautista-Bandigan nga natuman na gyod ang usa ka damgo nga maoy butang nga ikalipay sa tanang residente sa Malita ug bisan sa mga kasikbit nga munisipalidad.
"Natuman na gyod ang usa ka damgo, ug mas maningkamot pa kita nga mohimo og dugang mga balaud nga ikalipay ug ikaayo sa tanan natong mga residente ngari sa Malita," sulti ni Cong. Bautista-Bandigan sa pakighinabi sa SunStar Superbalita pinaagi sa telepono Lunes sa buntag, Hunyo 28, 2021.
Niadtong Huwebes sa gabii, Hunyo 24, 2021 gilagdaan ni Pangulong Duterte ang balaudnon nga mag-establisar sa Davao Occidental General Hospital nga unod sa House Bill No. 7321, gititulohan og "An Act Establishing A General Hospital in Barangay Lacaron, Municipality Malita, Province of Davao Occidental To Be Known As The Davao Occidental General Hospital, And Appropriating Funds Therefor."
Ang paglagda, gitambongan sa pipila ka mga miyembro sa Kongreso ug Malacañang, si Duterte miprirma og 16 ka balaod, 13 niini may kalambigitan sa panglawas ug hangyo alang sa pagdugang og bed capacity sa mga ospital sa nagkadaiyang bahin sa nasud.
Dugang ni Bautista-Bandigan, nahimong inspirasyon niini nga ospital ang moabot sa tulo hangtud upat ka oras ang pagbiyahe sa mga molupyo sa probinsiya una makapahimulos sa serbisyo sa tertiary hospitals nga naa sa siyudad sa Davao.
Ang hospital kasamtangan nga gipailawom sa konstraksiyon sa Barangay Lacaron sa Malita, ang kapital nga lungsod sa probinsiya.
Gilauman nga magamit na sa una o ikaduhang kuwarter sa 2022, ang 100 bed-capacity nga ospital uban sa dugang mga yunit matag tuig aron modaghan ang "occupancy and services."
Namugna ang Davao Occidental niadtong Oktubre 28, 2016 nga gisaak gikan sa Davao del Sur human ang referendum.
"Even before una ang pagbahin sa Del Sur, usa ka kini ka dako nga plano — plano nga alang sa katawhan ngari, ilaha kini, karon hapit nang magamit, gusto nato nga magamit kini sa unang kuwarter sa 2022," dugang niya.
Dako ang pasalamat ni Congresswoman Bautista-Bandigan ngadto sa suporta ni Senator Bong Go, ang chairperson sa Senate Committee on Health, uban sa pag back-up ni Senate Minority Leader Franklin Drilon aron ma-aprubahan ang HB 7321 ug ang SB 1616, ang katukuran sa maong ospital. (Jeepy P. Compio)