Kon wa’y mga kakulian, ang beterano nga Sugboanon ug three-point specialist nga si Patrick Cabahug adto na usab makapakita og aksyon sa Japan.
Kini human nga sa niaging semana, ang sakop sa MJAZ Zenith-Talisay City, runner up sa VisMin Super Cup Visayas leg, nakadawat og tanyag gikan sa usa sa mga team sa Japan B league, ang lega nga giduwaan ni Thirdy Ravena.
Matod ni Cabahug nga nakapirma na unta siya og kontrata sa team sa B2 division apan wala kini makaapas sa deadline.
Naghuwat na lang siya sa resulta sa negosasyon alang sa B1 division team.
“Sa B2 naa koy contract, unya wala lang kaabot sa deadline kay closed na pagka June 15 unya karon gi-negotiate na lang ang B1,” matod ni Cabahug sa online interview sa Superbalita.
Gipasabot ni Cabahug nga ang maong liga adunay tulo ka divisions--B1, B2, ug B3--nga adunay 58 ka mga duwa sa matag season.
Wa itago ni Cabahug ang kalipay sa dihang iyang nadawat ang tanyag.
“Katong pagdawat nako sa message, naka-smile ra ko. Wa nako damha nga makadawat ko og offer nga ganahan ba ko moduwa sa Japan,” dugang sa kanhi produkto sa University of the Visayas.
Dili man tuod bag-o alang ni Cabahug ang pagduwa ngadto sa laing nasod apan kini maoy unang higayon nga gitanyagan siya sa Japan.
Sa Asian Basketball League (ABL), si Cabahug nakaduwa og lima ka seasons ubos sa managlahing teams nga nagrepresentar sa ilang tagsatagsa ka nasod.
Sa iyang unang international career, ang lumad nga taga Minglanila, Cebu, kinsa anaa na karon nanimuyo sa Mabolo, Dakbayan sa Sugbo, niduwa ubos sa Malasiya Dragons sulod sa tulo ka seasons sa ABL.
Ning panahona, katulo man sab tuod sila makasulod sa playoffs apan wa sila makalabni og titulo.
Pero pila ka tuig ang milabay, nakaangkon si Cabahug og titulo ug ning higayona, ubos na siya sa Hi-Tech Bangkok, City.
Human sa iyang international stint, si Cabahug mibalik sa Pilipinas ug nakaduwa sa Casino Ethyl Rubbing Alcohol sa Maharlika Pilipinas Basketball League (MPBL). Ang MJAS Zenith-Talisay City sa VisMin Super Cup maoy labing uwahi niyang naduwaan. (JBM)