SECTIONS
Superbalita Cebu
Wednesday, September 22, 2021
SUPERBALITA CEBU

Espinoza: Bakuna ug dakop

Nagpakabana

Daghan ang nakugang sa anunsyo ni Presidente Duterte sa miaging semana nga iyang ipadakop ang dili magpabakuna bisan pa sa pagpasabot ni Justice Secretary Menardo Guevara, nga walay balaod nga nagtugot nga manakop sa dili magpabakuna batok sa Covid-19.

Sa akong tan-aw mora man og nanghadlok dala og komedya si Presidente Digong sa mga bata nga badlongon. Sa tinuoray lang, naa sad gyuy daghan nga nagpadala sa kahadlok nga mabakunahan batok sa Covid-19 tungod sa mga binuang nga storya ug labina kadtong mga napatik sa social media.

Sa karon, labi na dinhi sa Probinsya sa Sugbo, sa mga dakbayan ug kalungsoran ang kuwang, halangdon Presidente Duterte, mao ang bakuna. Gani, gisirhan na sad ang mga vaccination center dinhi sa Dakbayan sa Sugbo ug sa uban nga dapit tungod kay nahurot na ang bakuna sa miaging mga adlaw.

Matod pa ni Konsehal Dave Tumulak sa Dakbayan sa Sugbo sa usa ka interbyo, nga kon gitugtan pa unta ang mga lokal nga kagamhanan (LGU) nga direkta nga mopalit sa bakuna alang sa katawhan, di unta mahitabo nga makuwangan ug maundang ang pagpamakuna. Sa karon, ang nasudnong kagamhanan pinaagi sa IATF-DOH maoy nakignegosyar sa mga pabrika sa bakuna batok sa Covid-19. Ang Tsina ang numero uno nga nanghatag og libre nga bakuna, Sinovac.

Hinuon, gitugtan na karon ang mga pribado nga kumpaniya nga direkta nga mopalit sa bakuna alang sa ilang mga trabahador ug empleyado. Apan, dugay pa nga moabot ang gi-order nga bakuna sa mga pribado nga kumpaniya tungod kay kinahanglan man nga aprobahan pa sa Food and Drugs Administration (FDA), nga ubos sa Department of Health (DOH).

Angay na unta nga hatagan og katungod ang mga lokal nga kagamhanan, labina sa mga dagko nga dakbayan sama sa Cebu, Mandaue ug Lapu-Lapu, nga dunay kapasidad ug daghan og pundo nga maoy moderetso og palit gikan sa mga namuhat sa bakuna batok sa coronavirus aron mopaspas ang pagbakuna sa katawhan, nga karon ang kadaghanan gusto na nga magpabakuna.

Ang mga LGU karon igo ra maghuwat kon pila kabuok nga bakuna ang ihatag sa IATF-DOH. Ingnon tang pung nga mora og makililimos ang mga LGU karon kay mag-agad man sa IATF-DOH kon pila kabuok ang ihatag nga bakuna. Gani, ang gihatagan og prayoridad karon sa pagpanghatag sa bakuna mao ang mga dapit nga daghan o misaka ang numero sa mga nangasakit sa Covid-19.

Sa laing’ bahin, misaka ang numero sa mga nataptan sa Covid-19 dinhi sa dakbayan sa Sugbo. Basi sa DOH Central Visayas Covid-19 Bulletin, niadtong Hunyo 27, dunay 77, nga bag-o nga kaso sa coronavirus nga sa miagi 55 ra unta. Sa dakbayan sa Mandaue misaka sa 19 ka kaso gikan sa 14. Apan ang dakbayan sa Lapu-Lapu miubos sa 19 gikan sa 29 ka kaso sa Covid-19.

Ang probinsya sa Sugbo misaka usab sa 539 ang kaso sa Covid-19 gikan sa 473. Ang Bohol miabot na sa 2,175 ang kaso sa Covid-19 gikan sa 1,839 samtang ang Negros Oriental miabot na sa 4,245 gikan sa 4,041.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph