Ipatawag sa Cebu City Council ang mga personnel nga adunay kasayoran may labot sa pagsulbad sa problema sa basura karong Hunyo 30, 2021.
Kini ang nasabotan human way quorum nga nakabat-ot sa Lunes, Hunyo 28, 2021 atol sa special session nga gipangulohan ni acting Vice Mayor Dondon Hontiveros isip presiding officer.
Nagkinahanglan sila og siyam, apan walo ra ka mga konsehal ang ningtambong sa session nga gilangkoban nilang Konsehal Renato Osmeña Jr., Garcia, Phillip Zafra, Eduardo Rama, Raul Alcoseba, James Cuenco, Jun Gabuya ug Lea Japson nga wala makakuha sa 50 percent plus one nga quorum.
Si Acting Mayor Michael Rama nihangyo sa Konseho nga mopahigayon og special session kagahapon.
Ilang nasabotan nga ipatawag silang Atty. Jigo Dacua sa Department of Public Services (DPS).
Si Konsehal Raymond Garcia gusto nga iapil sab ang Docast, general contractor paghakot sa basura gikan sa transfer station paingon sa landfill, City Treasurer, City Accountant ug Budget Officer para maoy molamdag sa mga lokal mga magbabalaod.
Lakip sa gustong ipaapil mao ang representante sa Arn Central Waste Management Inc, Bids and Awards Committee para ilang masaysay kon pila ang kontrata ug pila n alang ang pundo nga nahabilin sa paghipos sa basura.
Si Hontiveros niawhag sa mga mga konsehal nga motambong sa Hunyo 30 nga magsilbing regular session para ilang mahatagan og solusyon sa level sa konseho ang problema.
Ang Docast wala na gipalabay sa management sa landfill gumikan sa ilang P18 milyones nga bayranan sa miaging mga buwan hinungdan sa pagtipun-og sa basura sa transfer station sa Barangay Inayawan.
Apan ang Docast nanghimakak nga ingon niana ka dako ang ilang bayranan sa landfill.
Tungod sa wa una pagdawat sa landfill sa Binilaw, ang Docast adto kasamtangang molabay sa mga basura sa landfill sa lungsod sa Consolacion hangtod maplantsa ang kasungian. (PAC)