Nanghinaot ang Hunta Probinsyal nga maayo ang pagtuki sa mga health protocol sa Probinsya sa Sugbo atol sa tigom tali sa Provincial Board ug mga sakop sa Inter-Agency Task Force (IATF) sa Hunyo 29, 2021.
Ilang tukion ang resulta sa “critique” sa mga lagda nga gipatuman sa Probinsya sa Sugbo.
Matod ni Bokal Red Duterte sa kinto distrito sa Sugbo nga ilang paninguhaon nga hapsay ra ang tigom.
“Amo lang gi hope nga hapsay ang atong meeting ugma unya mag sabot-sabut lang mi along with our DOH Region 7, kon unsa ang flow ugma sa atong special session regarding aning issue surrounding aning returning overseas Filipino ug OFWs regarding sa ilang quarantine period,”matod ni Duterte sa Hunyo 28.
Subay sa unang nasabutan, lakip usab sa tukion ang Provincial Ordinance 2021-04 nga gi amendahan nga maoy naglatid sa swab-upon-arrival policy sa Probinsya.
Matod ni Duterte nga nagtuo ang Hunta Probinsyal nga adunay maayong sukaranan ang naasoy nga lagda sanglit maghatag kini og kasayon sa mga mopauli.
“...kay as what is stipulated sa among ordinance, we will stick to it as of now kay nakita namo nga mas effective gyud ni siya nga pamaagi kay aron pod ang atong returning OFWs ug returning Filipinos mas taas ang panahon nga makauban ang ilang pamilya,” asoy ni Duterte.
Si Bokal John Ismael Borgonia nagkanayon nga ni kompirmar na nga motambong sila si Health Secretary Francisco Duque III, Cabinet Secretary ug IATF-Co Chairperson Atty. Karlo Nograles ug Director Alethea De Guzman gikan sa Health Epidemiology Bureau.
Lakip usab si Department of the Interior and Local Government (DILG) Undersecretary Epimaco Densing III ug representante sa World Health Organization (WHO).
Sa Hunyo 28, Lunes giandam na ang Capitol Social Hall nga maoy mahimong venue sa tigum karong hapon.
Gibutyag ni Bokal John Ismael Borgonia nga lakip usab sa dinapit nga bisita mao ang kadagkoan sa lalawigan aron pag-obserbar sa himuong special session.
“...With Cebu mayors as invited guests, but they cannot speak but if they have questions, they may course it through their respective board members of their district,” matod ni Borgonia sa Hunyo 28. /
Ang special session nairog tungod sa hangyo ni Duque sa Probinsya gumikan sa importante nga pulong usab nga gitambongan sa kaulohan.
Gidapit ni Cebu Governor Gwendolyn Garcia sila si Duque ug mga sakop sa IATF ingon man ang mga eksperto atol sa Senate hearing aron ipasabot ang critique sa protocols sa Probinsya sa Sugbo. (ANV)