MINGHOY sa selda ang mag-uyab human sila nangadakpan sa kapulisan atol sa gihimong joint buy-bust operation sa mga operatiba sa Regional Special Operation Group-Regional Police Drug Enforcement Unit (RSOG-RPDEU-Davao) ug Buhangin Police Station, pasado alas 11 sa gabii, Hunyo 28, sa Buhangin Road, Davao City.
Mga dinakpan mao sila alyas Amanda nga anaa sa drug watchlist, 21 anyos, taga Barangay Pagasa, Rosales St., Cotabato City, ug jowa niining si Khali Musa Kadatuan, 27, taga Kurontem Dos, Maguindanao Province.
Ang duruha napalitan sa poseur buyer og shabu nga giingong nagbalor og P10,000.
Luyo sa buy-bust item, nakuha sab kanila ang laing upat pa ka pakite sa gituohang shabu.
Anaa kini sa mga 25 gramos ug mibalor sab og P400,000.
Ang duruha mag-atubang og kasong paglapas sa Republic Act 9165, kun Comprehensive Dangerous Drugs Act of 2002. (Jeepy P. Compio)