Kon sumbagayon wa gayud dag-anan si Presidente Rodrigo Duterte ni Senador Manny Pacquiao.
Nagdako man ang away ni Duterte ug Pacquiao human ang senador niingon nga dunay pangurakot sa gobiyerno.
Gihagit sa Presidente ang senador sa paghingan sa mga tawo ug buhatan sa gobiyerno nga nalambigit.
Nindot kay wa mahadlok si Pacquiao sa pakigsungay sa Presidente kay duna nay isog sa Senado nga misul-ob sa sapatos ni kanhi senador Antonio Trillanes.
Kay sa Ubos Balay-Balauranan kun Kongreso aduna may Makabayan bloc nga misukol sa Presidente.
Kini sila dili mga itoy ug magbarug sa tinuoray nga demokrasya sa Pilipinas nga sa pagtuo sa katawhan nahulga karon.
Sayon ra man sabton nga nagsulti sa tinuod si Pacquiao sa pangurakot karon sa gobiyerno ug nahibawo na mismo si Duterte?
Si Pacquiao nga usa ka Diyosnon dili kana bastabasta mopasangil ug kon wa maghupot og mga dokumento.
Nagdako ang away sa duha sa dihang ang senador mikomentaryo sa isyu sa West Philippine Sea nga dunay isla giilog na sa China
Ang tubag sa Presidente gipikhan ang senador nga magtuon una. Mura bitaw og insulto nga nagkaminos sa edukasyon sa senador. Ang duha suod nga higala ug kauban pa gani sa partido.
Si Manny maoy acting president ug si Digong maoy chairman sa PDP-Laban.
Ug may tinguha sab ang kampo ni Duterte nga tangtangon si Pacquiao sa partido sa dihang mitumaw ang Go-Duterte tandem alang sa 2022 presidential elections
KRIMEN SA ISABEL
“Ayaw patya si Papa.” Mao kini ang gipamahayag sa duha ka mga anak ni Devin Murillo, ang biktima sa pagpatay sa armadong mga tawo sa Lungsod sa Isabel, Leyte.
Ang reklamo nga nadawat sa Agila nagbutyag gi-blotter sa biktimang Murillo ang pagpangulata sa usa ka pulitiko sa ilang lungsod.
Kay dunay gi-post sa social media sa isyu sa korapsyon. Naghilak ang duha ka anak ug asawa nga di patyon. Email: efrenlonzon71@gmail.com Text: 09235562777