MAAYONG adlaw mga Super Suki!
Hulyo na ta karon. Tulin ang pagdagan sa mga adlaw, nilampas na kita sa katunga sa 2021.
Samtang nagkaduol ang 2022, nagkadaghan ang mga kauban sa panaw sa administrasyon ni President Rodrigo Duterte ang nagabaid sa ilang sungay, pangandam sa umaabot nga bugno sa eleksiyon.
Si Senador Manny Pacquaio nabaniog nga nangandoy pagkuha sa pinakataas nga lingkuranan sa kagamhanan sa atong nasud, makadaghan na nagbatikus sa administrasyon ni Pangulong Digong nga tulo ka pilo ang pagka-"corrupt" sa mga ahensiya sa gobyerno kay sa milabay nga mga administrasyon.
Iya sab nga gibatikus ang pagtagad ni Digong sa isyu sa West Philippine Sea nga wala gituman sa Presidènte ang iyang saad panahon sa pagpangampanya pa niini nga mosakay siya'g jetski ug moadto sa Scaborough sa isla sa Spratly aron iugbok ang bandila sa Pilipinas. Pagmatuod sa mga Chinese nga lakip sa nasud ang maong mga isla.
Dihang presidente na siya, iyang gibawi ug miingon nga pasiaw ra kadtong mga saad panahon sa iyang pag pangampanya.
Namatikdan ni Pacquiao nga sa hinay-hinay ginaputol na ni President Digong ang migitib niyang pangandoy nga mahimong presidente sa nasud.
Gisugdan sa pagbali ni Digong ang iyang gahum isip acting president sa PDP-Laban. Wala gani siya giimbita sa meeting sa PDP-Laban didto sa Cebu.
Karon, misaad si Digong nga iyang pangunahan, adlaw-adlawon ang pagbutyag sa pagka-bakakon ni Pacquiao.
Babag ba si Pacquiao sa politikanhon nga mga panglantaw sa administrasyon? Dako ang posibilidad nga mabungkag ang panaghiusa sa PDP-Laban diin si Pŕesident Digong ang chairman ug si Pacquiao ang acting president.
Ang tam-is nga panag-uban sa politika nagkahinay na pagkatab-ang tungod sa personal nga interest sa matag usa.
Posibilidad kini nga mas molig-on ug modako pa ang regional political party sa Hugpong Ng Pagbabago (HNP) ni Mayor Sara Duterte-Carpio kay naandan na man sa mga politiko ang pagbalhin-balhin og partido kon asa sila makabenepisyo.
Believe sa sarili si Pacquiao nga ginapakisama sa boxing ang pagka-presidente diin siya giila nga hawod.
Ato nang nasinati panahon sa pagdumala ni President Joseph Estrada unsay gidangatan sa nasud tungod sa kakulang sa kahibalo sa pagdumala sa nasud.
Dalayegon ang tawo nga gustong moserbisyo sa iyang isig-katawo apan sama sa pagluwas sa tawo nga nalumos, kon ang magpaalig-alig nga mosalbar kulang sa kahibalo, wala gyuy maayo nga sangputanan.
Dunay pipila ka partido nga nagadugang pagsugnod kang Pacquiao nga maayong mahimo nga sunod nga pangulo tungod ilang nakita nga puwede ra nila madiktahan ang direksiyon sa nasud kon ugaling siya maoy mogunit sa renda sa kagamhanan.
Personal interest lang gihapon ang nagatukmod kanila aron kab-uton ang dugay na nilang gilaraw nga kab-uton.
Atong masaksihan sa umaabot nga mga bulan ang mga ginatawag nga balimbing nga mga politiko.
Maayo nga taas pa ang atong panahon aron timbang-timbangon kinsa ang posibleng makahatag sa maayong kaugmaon sa nasud.
Dili kalikayan, magapabilin ang self-interest sa mga mosunod nga mga pangulo, apan atong panghinaut, unta ila sab tan-awon ang maayo nga sangputanan sa katawhan.