DUHA ka mga indibiduwal ang nasikop sa kapulisan sa Davao City Police Office sa duha ka managlahing buy-bust operation nga natigayon niadtong Martes, Hunyo 29, 2021.
Unang buy-bust natigayon alas 2 sa kaadlawon nga miresulta sa pagkasikop sa usa ka Richard Cesar Infante, 51-anyos, taga Bangoy, Davao City.
Sumala ni Police Major Carol Jabagat, hepe sa Ecoland Police Station, nga dugay na nilang gipanid-an ang lihok sa suspetsado hangtud nga mikubit kini sa nagtakuban nga pulis.
Anaa sa 14 ka mga pakite sa gituohang shabu nga dunay street value nga P20,000 ang nakuha sa posisyon sa dinakpan.
Tungod sa kawad-on sab ang gitudlong hinungdan sa usa ka alyas Helen, 53 anyos, nga nasikop sa kapulisan sa Sta. Ana Police Station nga gipangunahan no Police Major Benkalin Baluan.
Alas 4:15 sa hapon niadtong Martes, nasikop ang suspek sa panimalay niini sa Barangay 21-C, Piapi Boulevard, Davao City.
Anaa sa P20 mil ang kantidad sa gituohang shabu ang nakuha sa posisyon sa dinakpan.
Kasong pagsupak sa Republic Act 9165, kun Comprehensive Dangerous Drugs Act of 2002, ang atubangong kaso sa mga dinakpan didto sa korte. (Jeepy P. Compio)