ALANG ni Davao City Mayor Sara Duterte-Carpio nga kung mopapili isip bise presidente ang iyang amahan, kasamtangang Pangulo Rodrigo Duterte, segurado siya nga di kini mokuha og running mate nga babaye.
"I don't think if modagan si PRRD, mokuha na siya og running mate niya nga babae," suma sa mayor sa radio interview kaniya sa Davao City Disaster Radio niadtong Lunes, Hunyo 28.
Sa pikas bahin, hangtud karon, pabilin nga idlas si Duterte-Carpio sa pagtubag sa giingong pagpapili niya isip presidente.
Sa maong radio interview, gisulti sa mayora nga taas-taas pa ang mga adlawa, diin kutob pa 31 ang bulan sa Hulyo ug taas-taas pa ang paghunahuna niya niini.
Nauna nang namahayag ang mayora nga taliwala sa daghang nagdani kaniyang modagan siya, nabutang na sab siyang hunahuna ang pagkonsidera sa kung unsa mang desisyon kalabot sa maong katuyoan.
Sa pikas bahin, mapasalamaton si Duterte-Carpio sa mga grupong padayong nagtuboy niya sa puwesto.
Ning bag-o lang, ang Ituloy ang Pagbabago Movement (IPM) nga gilangkuban sa mga opisyales sa barangay ug ubang bahin sa nasud naghiusa aron dasigon ang mayor nga mopapili nga pangulo.
"Magpasalamat ko sa tanang suporta and trust and confidence sa mga tao na nagform sa IPM," sulti sa mayor. (Jeepy P. Compio)