KORONADAL CITY -- Gipangita na sa mga awtoridad ang inahan sa masuso nga gisulod og backpack ug nagbilin pinaagi sa pagsab-ong niini sa ganghaan (gate) sa usa ka balay alas 5:30 sa buntag, Martes, Hunyo 29, 2021, sa Norala, South Cotabato.
Matud ni Mary Kris Aquino Dela Cruz nga taga Purok Aquino, Barangay San Miguel sa maong lungsod nga nakadungog sila og hilak sa bata sayo sa buntag.
Sa dihang gisusi sa trahabante ni Dela Cruz nga si Ricky Dequina ang gigikanan sa hilak sa bata, nakurat kini kay gikan man sa sulod sa kolor blue nga backpack nga gisab-it sa gate sa balay sa iyang agalon.
Sa dihang giabrihan, nakita ang bag-ong natawo nga bata sulod sa bag.
Gitunol dayon ni Dela Cruz ang bata ngadto sa ilang mga opisyal sa barangay nga maoy nagdala sa balay tambalanan.
Ang bata anaa na karon sa buhatan sa Department of Social Welfare and Development ug naa na sa maayong kahimtang.
Apan padayon pa nga gisusi sa mga awtoridad ang maong dapit aron nga matumbok ang inahan sa bata.