MIABOT na sa 9,984 ang kinatibuk-ang ihap sa mga kumpirmadong kaso sa Covid-19 sa Cagayan de Oro human 63 ka mga residente sa dakbayan ang mipositibo sa novel coronavirus, sumala sa report sa City Health Office Miyerkules, Hunyo 30.
Sumala sa City Health Office, sa 63 ka mga bag-ong lokal nga kaso, 29 ang mga local index nga mga kaso, 23 ang mga close contacts sa mga pasyenteng nagpositibo sa coronavirus, unom ang mga lokal authorized persons outside residence (Apors), usa ang Apor with link, usa ang person deprived of liberty (PDL), ug tulo ang mga patay.
Ang Cagayan de Oro adunay 1,063 ka mga active cases, 325 niini na-admit sa Northern Mindanao Medical Center ug uban pang mga ospital sa syudad, ug 738 ang mga outpatients.
Nakatala usab og 57 ka mga coronavirus-positive nga mga kaso nga karon naka-recover. Anaa na karon sa 8,450 ang ihap sa mga nakarekober nga mga kaso sa dakbayan.
Ang ihap sa mga namatay sa Covid-19 sa syudad anaa na sa 471.