GARBO taliwala sa kapildihan. Kini maoy milihi sa batan-ong puwersa sa Gilas Pilipinas sa ilang unang duwa sa Fiba Olympic Qualifying Tournament batok sa Serbia nga gipahigayon sa Belgrade.
Napildi man tuod ang Gilas, 83-76, apan nakahatag kini og saktong kombati una naangkon sa Serbia, ang no. 5 team sa world basketball, ang kadaugan.
“A lot of people will look at this as some sort of moral victory. I’ve been in this game for such a long time and I just don’t believe in those,” matod ni Gilas coach Tab Baldwin.
Giangkon ni Baldwin nga anaa pa sa developmental stage ang batan-ong Gilas hinungdan nga biya ug underdog kaayo sila batok sa host Serbia.
Apan bisan pa niini, nakahatag kini og dakong hudlat batok sa team nga gipangulohan og lima ka mga beterano, lakip na ang higanting si Boban Marjanovic, ang 7-4 nga sentro sa Dallas Mavericks sa National Basketball Association (NBA).
Kini dakong sukwahi sa nahitabo niadtong 2019 diin ang powerhouse Serbia yano kaayong milubong og 59 puntos sa Pilipinas sa Fiba World Cup sa Foshan, China.
Gikan nga nabiyaan og 16 puntos, ang Pilipinas migukod ug milabni sa labaw sa makadiyot, 74-73, 3:50 ang nahabilin sa duwa pinaagi sa lay-up ni RJ Abarrientos.
Diha pa’y daghang kahigayunan nga mabingat pa unta sila sa bintaha bisan pa man sa mga boo nga milanog sulod sa arena apan wala lang gyud sila makalahutay.
Ang twin towers sa naturalized nga si Angel Kouame ug sa seven footer nga si Kai Sotto nakapakita usab og saktong labok sa ilawom nga bahin.
Si Kouame mikolekta og 17 puntos, pito ka rebounds, tulo ka blocks ug duha ka assists, 13 puntos ang natampo ni Jordan Heading ug 10 puntos gikan ni Sotto.
Ang Gilas miduwa nga wala ang ilang top scorer nga si Dwight Ramos tungod sa injury nga naangkon niini.
Mga puntos: Serbia (83) - Marjanovic 25, Dobric 16, Teodosic 13, Andjusic 12, Petrusev 8, Davidovac 5, Milosavljevic 2, Jovic 2.
Gilas Pilipinas (76) - Kouame 17, Heading 13, Sotto 10, Baltazar 10, Abarrientos 9, Tamayo 5, Navarro 4, Go 4, Belangel 2, Nieto 2. Quarters: 22-16, 45-34, 67-62, 83-76.