TAGUM CITY -- Tingkagol sa prisohan ang usa ka fish vendor human nasikop sa hiniusang puwersa sa kapulisan atol sa buy-bust operation alas alas 9:30 sa gabii niadtong Hunyo 30, 2021 didto sa Purok Durian, Barangay Magugpo, South.
Pinaagi sa "Isumbong Mo Kay Wilkins! hotline numbers" sa Philippine Drug Enforcement Agency (PDEA), nasikop ang suspek nga si Isagani Osabell Rosell alyas Gani, 53 anyos, minyo ug residente sa dapit.
Gilayong gikasa ang usa ka buy-bust operation nga maoy hinungdan sa pagkasikop sa suspek.
Usa ka pakite sa gituohang shabu nga dunay street value nga P9,000 ang nakuha sa posisyon sa dinakpan.
Kasong pagsupak sa Republic Act 9165 kun Comprehensive Dangerous Drug Act of 2002 ang atubangon sa suspek didto sa korte. (Jeepy P. Compio)