NAKATALA og 47 ka mga bag-ong kaso sa coronavirus disease (Covid-19) ang Cagayan de Oro, pulos mga local transmissions.
Ang kinatibuk-ang ihap sa mga kumpirmadong kaso sa Covid-19 sa dakbayan anaa na sa 10,031.
Matud sa City Health Office, sa 47 ka mga bag-ong lokal nga kaso, 32 ang mga local index nga mga kaso, walo ang mga local case with link, unom ang mga lokal authorized persons outside residence (Apors), ug usa ang patay.
Ang Cagayan de Oro adunay 1,069 ka mga aktibo nga mga kaso, 342 niini na-admit sa Northern Mindanao Medical Center (NMMC) ug uban pang mga ospital sa syudad, ug 727 ang mga outpatients.
Nakatala usab og 36 ka mga Covid-positive nga mga kaso nga karon naka-recover. Anaa na karon sa 8,486 ang ihap sa mga nakarekober nga mga kaso sa dakbayan.
Ang ihap sa mga namatay sa Covid-19 sa syudad anaa na sa 476.