USA sa mga labing unang makat-onan sa bata nga di pa gani makalakaw mao ang abli-sira sa kamot, dungan sa inahan nga moingon og “close open, close open.”
Mao ni ang nahitabo sa mga Covid-19 vaccination centers sa Siyudad sa Sugbo ug sa ubang mga dapit sa Pilipinas. Abli-sira. Ang mga vaccination sites sa Cebu City makabakuna unta og 5,000 kada adlaw.
Ning semanaha, sirado sila’g tulo ka adlaw, Hunyo 28 ngadto sa Hunyo 30.
Apan si Cebu City Councilor David Tumulak niingon nga nibukas sila kagahapon kay ang Department of Health (DOH) 7 nigahin og dugang 5,000 ka doses.
***
Si Dr. Jeffrey Ibones, officer-in-charge sa Cebu City Health Department (CHD), niingon nga lisod nga makab-ot ang “herd immunity” sa pagtapos ning tuiga tungod sa kakuwang sa bakuna.
Matod niya kinahanglang mabakunahan ang labing menos 70 porsyento sa populasyon aron makab-ot ang herd immunity. Ang Cebu City adunay populasyon nga mokabat sa usa ka milyon, apan di pa available kon pila niini ang eligible alang sa bakuna.
Ang target sa Siyudad mao nga mabakunahan ang mayoriya sa mga residente sa mga bukirang barangay sa Septiyembre, apan dakong babag sa ilang operasyon ang kakuwang sa supply sa bakuna.
***
Way angay nga kabalak-an, matod pa ni Ibones, kadtong nakadawat na sa unang dose sa bakuna kay dunay gigahin alang sa ilang second dose. Sa pagkakaron, miabot na sa 270,000 ka mga individuals sa Cebu City ang nagparehistro alang sa bakuna.
Ang nabakuna sa publiko ug pribadong sektor hangtod sa Hunyo 29 dinhi sa syudad sa Sugbo niabot na og 149,217 ka doses. Ang nabakunahan niabot na og 103,308 ka mga residente, ug niini, 45,909 na ang nakadawat sa ikaduha nga dose.
Kadtong gusto na nga magpabakuna, pailob og dyutay. Ang binulto nga bakuna nga gikompra sa gobyerno umaabot pa. Sa pagkakaron, close open, close open lang una ta sa atong vaccination centers.