Ug sa kalit ang mitik-op ang damgo sa Gilas Pilipinas nga makaduwa sa Olympics.
Usa ka adlaw human nakahatag og saktong kombati batok sa powerhouse Serbia, ang batan-ong Gilas nasugamak og dakong kapildihan sa mga kamot sa mga beteranong Dominican Republican, 94-67 sa Fiba Olympic Qualifying Tournament sa Belgrade, Serbia.
Human sa sikit nga panag-engkuwentro sa first half, gisugdan sa paglubong ang mga Pinoy sa second half human mipahagsa ang Dominican Republik og 26-10 nga rally sa third quarter.
Ang 12 ka sunodsunod nga puntos nga wa matubag sa Gilas ang naghatag og timaan nga miluta ang ilang kakulang sa eksperiyensya ug niini miinat ang bintaha sa kontra ngadto sa 65-51 human sa tulo ka mga quarters.
Gikan niini, wa na gyud makapakita og labok ang mga Pinoy nga nakamugna og 23 ka turnovers nga napahimuslan og maayo sa Dominincan Republic.
Sila si Victor Liz ug Gelvis Solano maoy nangulo sa Republicans. Si Liz mitapos sa duwa nga may 23 puntos samtang si Solano mitali og 21 puntos, lima ka assists ug tulo ka steals.
Ang kadaugan naghatod sa Dominican ngadto sa semifinal round nga may 1-1 nga baraha sa Group A. Ilang ikasangka ang Group B lider nga Italy.
Ang kapildihan naghatag og dakong leksiyon sa mga batan-on apan masaaron nga Gilas kinsa nakapanghudlat sa Serbia sa wala pa sila mapildi, 83-76.
Batok sas Dominican, nakaposte unta sila og otso puntos nga labaw sa tungatungang bahin sa second quarter, apan tungod sa kakapoy tungod sa sunodsunod nga duwa, wa kini makalahutay.
Si Jordan Heading maoy mibida sa Gilas ug mitapos sa duwa nga may 16 puntos. Si Ange Kouame adunay 10 ug unom ka rebounds.
Mga puntos:
Dominican Republic (94) - Liz 23, Solano 21, Torres Cuevas 20, Nunez Castillo 13, Francis Ramirez 5, Rojas 4, Araujo 4, Santos 2, Mendoza 2, Henriquez 0, Feliz Sarita 0, Martinez 0.
Philippines (67) - Heading 16, Kouame 10, Sotto 8, Navarro 6, Belangel 6, Abarrientos 6, Baltazar 5, Tamayo 5, Nieto 4, Go 1, Chiu 0. (JBM)