PASAKAAN og kasong paglapas sa Republic Act 9165 o Comprehensive Dangerous Drug Act of 2002 ang lima ka mga suspek nga nadakpan atol sa ronda sa mga awtoridad sa drug den alas 7:15 sa gabii niadtong Huwebes, Hulyo 1, sa Pikit, North Cotabato.
Mga nadakpan giila nga sila si Vicente Sambo, 38, minyo, negusyante kinsa maoy gitumbok nga nanag-iya sa drug den ug iyang igsuon nga si Mark Sambo, 33, ulitawo, drayber.
Nasikop sab sila John Mechor Colita Pacheco, 35, Robert Louise Cadalso Pacheco, 19, ug si Ryan Dela Serna Layna, 28, mga molupyo sa Barangay Poblacion sa nahisgutang lungsod.
Nasayran gikan kang North Cotabato Provincial Police Office Director Colonel Henry Villar nga gironda sa ginsakpan sa Philippine Drug Enforcement Agency (PDEA) Soccsksargen, uban ang mga sakop sa Pikit Municipal Police Station ug 90th Infantry Battalion, Philippine Army ang drug den nga giingong iya ni Vicente sa nahisgutang barangay.
Wala na makaikyas ang mga suspek sa diha nga napalibutan na sa mga awtoridad.
Narekober sa raiding team ang mga shabu nga kantidad og P102,000, drug paraphernalias ug mga personal nga kagamitan.
Gikanayon ni PDEA-Soccsksargen Regional Director Naravy Duquiatan nga dugay na nila nga gipanid-an ang grupo ni Sambo apan niadtong Huwebes naaktohan gyud sa mga awtoridad. (Edgar E. Fuerzas)