SECTIONS
Superbalita Cebu
Tuesday, September 21, 2021
SUPERBALITA CEBU

Nadela: Pangampanya sa larangan, tinuwahan

Asoy Ni

NAGHILAB ang akong tiyan sayo sa buntag samtang nagsakay ko og dyip. Sa akong hunahuna kinahanglan nga makahigop ko og init nga sabaw. Samtang nagdagan ang dyip, nagsige ko og aninaw sa gawas sa pamasin nga may maagian ko nga kan-anan nga makatabang og sulbad sa akong gibati.

Tungod sa importanting transaksiyon sa usa sa mga eskwelahan sa siyudad, napugos ko pagbiyahe og sayo nga way sud ang tiyan. Form 138 ug form 137 maoy akong misyon alang sa akong anak nga tungod sa pandemiya napugos og balhin sa laing eskwelahan. Bag-o lang niyang gitapos ang mga module sa Grade 8 sa Pardo National High School, apan wala pa ang duha ka importanting dokumento nga maoy akong lakaw niadtong buntaga.

Seguro ko nga wa ko mag-inusara ning maong matang sa transaksiyon. Ang pandemiya maoy nakaingon ning tanan.

Pag-agi nako sa eskina dalan Tupas ug Flores sa Barangay Pasil, nanuktuk ko pagpahibalo sa drayber nga manaug nako. Sa akong gikanaugan naaninaw na nako ang daghang kustomer sa larangan ug tinuwahan sa pamilyang Garcia. Ang nagbukal nga mga kawa ang nibantang sa akong panan-aw. Luto na ang lamian nga pakol ug tagutungan nga maoy unang naluto niadtong buntaga.

Si Junior usa sa mga anak ni anhing Nemesio Garcia maoy nagtakus sa order sa mga kustomer. Apil ko nga iyang gitaksan sa larang nga pakol. Si Junior ug iyang mga igsuon sinati na kaayo nako dinhi sa ilang kan-anan sanglit panahon pa sa kolehiyo ko nahimong suki dinhi.

Human makapamahaw nagtabi mi ni Junior ug nahisgutan ang mga kagahapon nako sa ilang kan-anan. Usa ni sa labing dugokon sa mga kustomer kong maghisgot na og larang ug tinulang isda. Gawas sa mga yanong kustomer, nakakaon na sab dinhi ang mga gitawag nga bigatin sa katilingban. Apil na ang mga politiko dinhi sa ato ug sa kaulohan.

Dinhi nisangko ang among mubo nga panagkukabildo. Mga politiko nga nakakaon sa ilang pinubring kan-anan. Daghan siya og gipanghisgutan nga mga dagkong tawo sa pulitika. Matod ni Junior basta panahon sa kampanya sa eleksiyon lakip sa nasum-ok dinhi mga kandidato sa mga nasudnong posisyon sama sa pagka senador.

Sa ilang paglibot libot sa Barangay Pasil ug sikbit nga mga barangay, anhi mosangko ang mga politiko. Tungod kay gabaha sa kustomer, makatarunganon lang daghang lamanohay ang makita dinhi ning maong kan-anan. Agi pagpamatuod sa ka seryuso da ilang pagdagan, moapul sila og kaon sa lamian nga larang ug tinuwang isda.

Gani nagplano sila nga ang mga picture among ipatarpulin. Pangalan sa mga kanidato sa pagka senador, kongresista, mayor, bise mayor ug konsehal iyang gihisgutan nga nahimo nilang kustomer dinhi.

Para nako angayan lang maapil sa ilang ruta ang maong kan-anan sanglit di pag-unsa daghan sa mga nangaon ang suheto sa politika ug makamaong mohimulso kinsa sa mga kandidato ang hatagan sa ilang boto de kompiyansa.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph