DUNAY panultihon nga “when it rains, it pours” maong kung moabot gali ang problema magdungan, mag-abot o magsapawsapaw. Feeling nimo murag nagpas-an sa tibuok kalibutan kay sarang bug-ata o sakita sa gibati.
Ehemplo sa mga naka-ingon ini (stressors) ang mosunod: Pagkamatay sa imong minahal, pagkataktak sa trabaho, pagla-undok sa utang, pagpahimo o palit og balay, pagkabuwag sa hinigugma, pagkasakit o ospital, pagkasakit sa makamatay nga cancer og uban pa.
Lainlain ang timailhan ini sama sa pagpaningot og bugnaw, kabuhion, pagpangurog, sakit sa tiyan, kalibanga, kasukaon, way gana nga mokaon, way tulog, pagpangluya og tumang pagpangulba nga murag naay naggukod.
Way stress o problema nga di masulbad kay ang tanang isyu dunay solusyon lainlain lang ang gidugayon sa pagsulbad-ini o pagdala sa problema.
Ang uban maulian human sa 2-3 ka adlaw kay makakita na og kasulbaran sa isyu. Ang uban sab mokanat og tagpila ka buwan. Ang kadaot kay kadtong ma-abatan og tinuig unya di na kaagwanta sa ilang stress delikadong malisu-an sa pangisip o magpakamatay.
Diay akong mga suhistiyon, isip usa ka trained Critical Incidence Stress Debriefer, para makalabang ining temporaryong stress: Adto sa linong ug mabugnaw nga dapit dayon ipiyong sa makadiyot ang mata unya ginhawa og lawom para maka-sulod ang preskong hangin sa lawas. Buhata kini sa 5 ka beses hangtod mahuwasan sa kakulba nga gibati.
Inom og Chamomile tea, melatonin o gatas aron makatulog og insakto, mga 7-8 ka oras, aron insakto ang pagpahuway.
Paminaw og mingaw o musika nga pang-spa kay makapakalma kini sa imong hunahuna.
Pamasae o pahilot para ma relax sab imong kaunuran.
Ayaw pagsige og tago sa ngitngit nga lawak. Hinuon, gawas, pag ehersisyo og pa-init sa adlaw. Idagan, jogging o ilakaw ang imong kakulba.
Ayaw pa pilde sa stress. Kaon og masustansiyang pagkaon bisay way lami aron di mapasmo o malunusan sa kagutom.
Labaw sa tanan, ihangad sa Labawng Makagagahom ang imong mga kaguol, kahadlok ug kahingawa.