ANG kahugaw sa pinuy-anan, buhatan o komunidad nagsamin sa pamatasan sa nagpuyo sa dapit. Ang kahugaw nagdapit og sakit. Dili hamugaway nga pagpuyo. Apan duna kini lawom nga sikolohikal nga gipasabot, ang kahugaw sa galamhan o moralidad. Sama nga ang pagkahugawan katugbang sa pagkadautan. Busa ang kalimpiyo yano apan batakang basehanan sa pagpatuman sa kausaban.
Sakto ang bag-ong pangulo sa Philippine National Police (PNP), General Guillermo Eleazar, nga nikanaug sa Intensified Cleanliness Policy 3 (ICP 3) sa pagtunhay sa kalimpiyo sa buhatan ug paglibot lakip sa paghimo sa ilang serbisyo ngadto sa katawhan nga mahigalaon. Ang kapulisan di lang tigmintinar sa kahusay ug kalinaw apan ehemplo sa iyang pagkatawo lakip sa kalimpiyo.
Kon lago ang postura ug hugaw usab ang ilang palibot, makaduda nga daghang abusado, mapahimuslanon o kurakot nga awtoridad sa maong buhatan o presinto. Takos nga impresyon alang sa programa sa pagtul-id sa ahensiya nga puno sa kontrobersiya? Hinuon, dili tanan, pwera sa maayo. Apan risgo usab sila nga matakdan sa kadugayan.
Si Eleazar, uban sa mga sakop sa National Internal Affairs Service, nibisita sa mga presinto ubos sa Cebu Provincial Police Office (CPPO) sa miaging buwan. Way lipudlipod kini sa pagkomentaryo nga daghang presinto nga hugaw ug mga pulis nga walay insaktong uniporme atol sa ilang duty busa, nimando siya sa mga opisyal sa pagpahimo og aksiyon.
Tungod sa naasoy nga kamandoan, nasampolan ang 30 ka personnel sa Station 1 sa City Mobile Force Company nga girelibuhan ug gidestino sa Police Holding Admin Unit sa Mandaue City Police Office (MCPO). Isip silot, sila mopaubos sa transformation program sa PNP. Matag buntag manglimpyo sa lima ka police stations sa MCPO. Sulod sa pipila ka adlaw, mahimo silang janitor.
Kay sumala sa panultion sa Iningles, “Cleanliness is next to godliness.”
Mithi nga gitamod sa hepe sa PNP. Aprubado.