NIPETISYON sa korte ang lima ka mga shipyard sa Barangay Tayud, Consolacion batok sa Kagamhanan sa Lungsod sa Consolacion human gihatagan lang sila og business permit nga balido sulod sa unom ka buwan, inay ang naandang usa ka tuig.
Napupos sa Hunyo 30, 2021 ang ilang business permit bisan kon nituman sila sa tanang rekisitos alang sa full-year nga business permit.
Ang lima ka shipyards mao ang Phil. Rigid Construction Corporation (PRCC), Fortune Shipworks Inc, Nagasaka Shipyard Inc., PKS SHipping Co Inc, ug Uni-Orient Pearl Venture Inc.
Niadtong Hunyo 29, 2021, nadawat sa Regional Trial Court Mandaue City branch ang “petition for certiorari and prohibition” gikan sa mga petisyoner batok ni Mayor Alegado ug ni Judith Pepito sa Consolacion Business Permit Licensing Office (BPLO).
Gisaysay sa mga petisyoner nga sila nakakompleto sa tanang rekisitos nga gipangayo sa lungsod base sa ordinansa niini ug sa citizen’s charter apan nahibulong sila nga kutob lang sila sa Hunyo 30.
Sa nanglabay nga mga tuig, ang ilang mga business business permit kutob Disyembre 31, apan karon Hunyo 30 nalang kutob.
Tungod niini, niadtong Marso 18, gikwestyon sa PRCC, Fortune Shipworks ug Nagasaka Shipyard pinaagi sa usa ka suwat ang basihan nganong kutob lang sila sa unom ka buwan.
Nangayo sab sila og giya kon unsay ilang angay nga buhaton aron mahatagan sila og full-year nga business permit.
Ang PKS Shipping ug ang Uni-Orient misuwat sab ngadto sa opisina ni Mayor Alegado sa susamang tuyo niadtong Abril 12.
Sa iyang tubag, si Alegado nangayo kanila og lease agreement o tenurial instrument sa Department of Environmental and Natural Resources (DENR).
Saysay sa petition nga wala sila mahibawo nga usa kini sa rekisitos sa business permi tungod kay wa kini malakip nga rekisitos sa nilabay nga mga tuig.
Gani, ang maong mag shipyard anaa na sa lugar sulod sa lima ka dekada.
Apan, miingon si Alegado sa Superbalita Cebu sa iyang depensa nga wa nagpasabot nga wa magpasabot nga kon wa pangayoa sa milabayng tuig, dili na kini pangayuon karon.
Sigon niya nga wa kini maapil sa ilang naandang rekisitos ug add-on lang kini.
Nalatid usab sa ilang ordinansa nga makakuha og business permit ang usa ka establisemento kon makatuman sa basic nga rekisitos ug sa uban pang dugang pangayuon sa kagamhanan.
Matod niya nga sa 11 ka mga shipyard nga anaa sa Barangay Tayud, Consolacion, tulo lang niini ang nakatuman sa tenurial busa ilang gihatagan og full-year business permit.
“It is very important because tenurial would reflect the ownership of the land. We cannot give a business permit if you do not own the land the you are operating,” sigon ni Alegado sa Superbalita Cebu.
Niadtong Hunyo 4, nisumiter na sab ang mga petisyoner sa ilang aplikasyon nga ipaabot hangtod sa Disyembre 31, 2021 ang ilang business permit.
Apan wa sila makadawat og reply sa lokal nga kagamhanan sulod sa 13 ka adlaw bisan kon ang pag-apply sa business permit mulungtad lang og usa ka adlaw, saysay sa ilang Citizen’s Charter.
Tungod niini, napugos og pasaka og reklamo ang Fortune Shipworks ngadto sa Anti-Red Tape Authority niadtong Hunyo 18.
Sa susamang adlaw, nakadawat sila og suwat gikan kang Alegado nga nibalibad sa ilang aplikasyon tungod kay expired na ang ilang tenure instrument sa DENR.
Sa summary hearing sa petisyon sa hapon sa Hulyo 1, nadesisyonan ni Presiding Judge Allan Francisco Garciano nga ipadayon ang status quo sa wala pa ang maong kontrobersiya.
Kini nagpasabot nga padayon gihapon ang pagpadagan sa mga shipyard sa lugar hangtod nga ang kaso alang sa certiorari madesisyonan na sa korte. (KFD)