TEMPORARYONG gikanselar ang pagtukod sa phase 4 sa Cebu City Medical Center (CCMC) nga gastuhan og P499.9 milyones aron madugangan ang pundo nga magtiwas sa 10-ka andana nga pampublikong tambalanan.
Kini ang gipadayag ni City Administrator Floro Casas Jr., atol sa pagbalik sa opisina ni Mayor Edgardo Labella human sa iyang tulo ka semana nga medical leave gumikan sa iyang gihambin nga balatian.
“Since naay gi-include karon sa SB1 (supplemental budget) nga P1 bilyon, naka decide ang BAC nga paaboton nalang na siya so that ang completion sa CCMC ato nang i-award og usa ka qualified nga contractor. Gi hold lang una na nato para mausa ang construction,”pasabot ni Casas.
Una niini, si kanhi city councilor Mary Ann de los Santos maoy unang ni post sa iyang social media account kabahin sa giingong pagkansela sa phase 4 kansang post iyang giulohan og “The fate of Cebu City Medical Center- lies, cancellation and impending calamity.”
Matod ni Casas nga gilikayan nila nga mahisama sa phase 1, 2 ug 3 nga lahi-lahi ang contractor nga niresulta sa pagkalangan sa pagkahuman sa edepisyo.
Ang pagtrabaho sa edipisyo gisugdan niadtong 2015 ug hangtod karon padayon pa ang trabaho.
Gipahibawo ni Casas nga adunay P1 bilyon nga gipangayong pundo si Labella sa City Council ilawom sa Supplemental Budget number 1 para makumpleto na ang CCMC.
“We decided nga i-cancel nalang ang phase 4 kay sa phase 1,2, 3 nakakita ta og mga challenges nga lainlain ang mga contractor nga nagdala. Grabe kaayo ang challenges nila. Kon mapareha sa phase 1,2,3 nga lainlain ang contractor, ma chopsuey gyud ang labas,”dugang sa City Administrator.
Si Labella nangayo og kapin P4 bilyones ilawom sa SB1 diin ang P1 bilyon gamiton pagtiwas sa construction sa CCMC nga gisugdan sa administrasyon ni kanhi mayor ug karon Bise Mayor Michael Rama.
Sa pagkakaron, ang unang upat ka andana maoy gigamit sa Siyudad sugod sa Marso ning tuiga.
Gidali ang pagtrabaho labina dihang paspas nga nisaka ang mga kaso sa coronavirus disease. (PAC)