ANG Metro Cebu Water District board of directors nipasar og resolution paghangyo sa Cebu City Government ubos sa liderato ni Mayor Edgardo Labella nga hatagan sila og P200 milyones nga annual water subsidy sugod sa 2022.
Ang BOD pinangulohan ni Chairman Jose Daluz III maoy nagpasiugda sa programa nga giaprobahan ni Labella human usab ang Siyudad maghatagan og binilyon nga financial assistance matag tuig ngadto sa mga senior citizens, persons with disability, barangay employees ug daghan pa.
“Residents of Cebu City in particular, the marginalized sector are not spared by the devastating impact of Covid-19 pandemic and have suffered extreme financial repercussions and all other unfortunate circumstances,” tipik sa resolution sa BOD niadtong Hunyo 23, 2021.
Ang 35,000 ka mga konsumidor sa MCWD sa Cebu City nga malibre mao kadtong adunay konsumo nga di molapas sa 10 cubic meters kun 50 ka baril o 100,000 liters matag buwan.
Kon maaprobahan sa City Council ang P72 milyones nga water subsidy sa nahabiling unom ka buwan ning tuiga, sugod nga makapahimulos ang 35,000 ka pamilya karong Hulyo hangtod sa Disyembre ning tuiga, diin wa na silay bayran sa MCWD.
Si Daluz nihulagway nga dako na kining tabang ngadto sa libuan ka mga pamilya sanglit sila malibre na sa P5.45 milyones matag buwan kun P65.5 milyones matag tuig.
Ang chairman sa BOD sa MCWD nagkanayon nga ang water subsidy nga ihatag sa Cebu City magsilbing bayad sa konsumo sa 35,000 ka pamilya nga adunay 10 cubic meters paubos matag buwan.
Mao sab kini ang kuhaan para sa charges sama sa power cost adjustment, price consumer index, franchise fee ug ubang bayranan sa mga nag-minimum og konsumo sa tubig nga taga Cebu City.
Anhi sab kuhaon ang pag-develop sa surface water sources sa dakbayan nga maoy magsilbing tinubdan sa tubig sa MCWD ug pun-an ra kini sa ilang buhatan sanglit dili kini paigo nga ibuhat og dams.
Si Majority Floor Leader Konsehal Raymond Garcia maoy mopalabang og resolution sa Konseho aron aprobahan sa City Council.
Ang pagtugot sa Konseho maghimong legal sa paglibre sa tubig sa di pa mohimo og memorandum of agreement ang duha ka mga institution.