Binasi sa Ezekiel 2:2-5; Salmo 123; 2 Taga-Corinto 12:7-10; Marcos 6:1-6
Makalingaw ning pulong “napahingangha”. Mabulokon. Milarawan sa tawo nga nakalitan, nanindotan, o nibati og tumang kataha. Wala nay ikasulti pa ang nag-abri nga bâbâ. Nagnganga na lang kini. Bisan sa atong paglitok sa maong pulong – “nagnganga” – makapaabri na sa atong bâbâ.
May mga debuho nga makapahingangha. Adunay mga artista sa pelikula nga maayo kaayong moarte – makaapaabri sa bâbâ. Naay mga tanan-awon sa kalangitan nga mahipatik sa alimpatakan tungod sa ilang katahom ug katalagsaon. May buhat sa kaluoy ug puangod nga wala damha ug tinuoray. Makapahingangha.
Apan, matag karon ug unya, dili positibo ang gipasabot niining pulonga. Sa atong ebanghelyo, si Jesus “wala makahimo didto og mga milagro gawas sa pagtapion sa iyang mga kamot ug pag-ayo sa pipila ka mga masakiton”. Kini ang subo nga nahitabo didto sa Nazaret, ang “iyang lungsod nga nadak-an.” Ngano man? “Wala sila motuo kaniya”, sumala ni Marcos. Nakaminus ang mga katagilungsod ni Jesus. Mitapos ang ebanghelyo: “Ug natingala siya sa ilang pagkawalay-pagtuo.”
Mahimo pod nga hubaron ang “natingala” sa “nahingangha”. Mao gihapon kining pulonga sa Griyego diin gilarawan ang gibati ni Jesus sa mapaubsanon ug masaligong pagtuo sa senturyon kansang sulogoon himalatyon: “Ginuo, dili ko angay nga mopadayon kanimo sulod sa akong panimalay; apan paglitok lamang og pulong, ug mamaayo ang akong sulugoon.” Napahingangha si Jesus.
Sa ebanghelyo karong adlawa, laing matang ang pagkahingangha ni Jesus. Dili kini makapadangat og kalipay ni pasalamat kondili kaguol ug kahigwaos. Sa tinagalog pa, “sayanga” oy. Usika oy. Sila na hinuon nga iyang mga kauban sa Nazaret maoy wala moila kaniya. Nakaminus sila kaniya. Milabay ang kahigayonan nga makabaton og daghang kaayohan apan ila kining giusikan!
Sagad sukwahi ang kinaiya sa tawo sa plano sa Dios. Sumala pa ni propeta Ezekiel, “Ipadala ko ikaw ngadto sa katawhan sa Israel, katawhan nga masupilon...Mga gahi silag ulo, ug way tahod kanako.” Mora usab og nakapahingangha kini sa Ginuo. Bisan pa man niini, hatagan lang gihapon niya og kahigayonan ang iyang katawhan pinaagi sa mensahe sa propeta.
Sa sulat ni San Pablo, makaingon pod kita nga nahingangha siya sa misteryosong pamaagi sa Ginuo sa paghimo og kaayohan bisan gikan sa nakaapan o kahuyang ni Pablo. “Busa gikalipay ko pag-ayo ang pagpagarbo sa akong mga kahuyang aron maangkon ko ang gahom ni Cristo...Kay kon huyang ako, nan lig-on ako,” miingon si Pablo.
Makapahingangha ang gahom, katahom, kamatuoran, kaayo, ug gugma sa Dios. Dili gyod nato mabaslan ang Ginoo sa iyang kaayo. Unsang matang sa paghingangha ang mahimong bation sa Dios sa atong relasyon tali kaniya?