Maanindot huna-hunaon nga ang mga kabos nga konsumidor sa Metro Cebu Water District (MWCD) di na pabayron kay abagahon na sa Kagamhanan sa Dakbayan sa Sugbo. Nangayo ang Board of Directors (BOD) og P200 million sa Cebu City Government.
Ang P200 million kuhaan sa full subsidy sa 35,000 ka mga konsumidor, partial subsidy sa nagkonsumo og 11-30 cubic meters ug alang sa pagtukod og imprastraktura sa pagkuhag tubig sa mga tinubdan sa Tagbao ug Budlaan.
Kon eleksyon sa 2022 ang huna-hunaon, dako na kaayo ning puntos sa administrasyon karon. Bisan pag moingon nga pang eleksyon, apan ang paghatag niini nagpasayon sa kinabuhi sa mga kabos nga apektado kaayo sa pandemic.
Apan ang P200 million nga kwarta di gamay nga pundo. Dako kaayo kini nga kwarta. Busa, gikinahanglan sihag ang duha ka mga buhatan, ang MCWD ug City Hall, sa publikong kwentada sa nagastuhan sa kwarta, mga ngan sa mga beneficiary ug uban pa.
Gikonsulta ba usab kaha kini nila sa Commission on Audit (COA) kining lakang karon sa MCWD ug Siyudad?
Hinuon, dako og purohan nga makalabang kini sa Konseho kay gawas nga mayoriya ang mga kaalyado ni Labella, lisod usab pakgangon ang proyekto nga daghang mga kabos ug ordinaryong Sugboanon nga makapahimulos.
Kinahanglan usab nga seguraduhon Siyudad ug MCWD nga di mausik ang pundo nga gastuhon alang sa imprastraktura sa pagdala sa tubig sa kabukiran ngadto sa patag. Kana bang di lang sugdan, kon di humanon gyud ang proyekto aron madugangan ang supply sa tubig sa Dakbayan, labina sa mga konsumidor nga naa sa kabukiran nga igo rang hatdan sa water tankers.
Kay kon igo rang gisugdan ang proyekto apan di humanon ug mabiyaan kon lain nang administrasyon ang mopuli, tan-awon kini sa publiko nga tipik sa pang-eleksyon bisan kon ang tumong unta kaayuhan sa kinabag-an.