HANGTUD karon naglisod pa gayod og dawat ang pamilya sa usa ka 79-anyos nga na-trap sa sunog niadtong Sabado sa buntag, Huly 3, 2021, didto sa Purok 4, Rizal Extension, Barangay 38-D, Poblacion, Davao City.
Sa report, usa ka Rodolfo Nalzaro, retired engineer, ang wala na nakagawas sa balay dihang dako na kaayo ang kalayo.
Subay sa taho gikan kang Fire Officer 3 Aries Pizarras nga nagsugod ang kalayo sa kusina sa balay sa biktima. Dugang pa nga niadtong mga orasa, tulog pa ang edaran.
Pag-ulbo sa kalayo, dali sab kining mikanit sa kasikbit nga gambalay, apan dali ra sab kining na-fire under control sa kabomberohan sanglit dali rang nakaabot ang mga bombero kay anaa lamang sa downtown area ang sunog.
Dominggo sa buntag, dunay gikataho nga sunog sa Buhangin area diin dali sab nga narespondehan sa mga bombero, hinungdan nga wala na kakanit pa ang kalayo sa mga kasikbit nga mga balay. (Jeepy P. Compio)