ORMOC City - Gitugyan sa Department of Agriculture (DA) ngadto sa kagamhanan sa siyudad sa Ormoc ang test kits alang sa mga baboy nga nasakop sa radius niadtong baboy sa Barangay Salvacion nga naigo sa African Swine Fever (ASF).
Personal nga gidawat ni Mayor Richard Gomez ug City Councilor Lalaine Marcos ang maong kits alang sa 100 ka mga baboy.
Niadtong Hunyo 11, nangayo og tabang sa City Veterinary Office ang usa ka mamuhiay og baboy sa Barangay Salvacion human mabantayi ang posibleng sintomas sa ASF.
Gipaubos kini sa confirmatory test ug pagka Miyerkules, Hunyo 23, 2021, nigawas ang resulta nga positibo sa ASF.
Nikabat sa 136 ka mga baboy nga nasud sa 500-meter radius ang gipamatay aron malikayan ang pagkuyanap niini.
Matod ni Dr. Joseph Cortes sa CVO, mga sobrang sud-an nga napasaw sa baboy ang posibleng gigikanan sa ASF.
“Naa may uban nga namista adto sa laing lugar nga naay ASF unya makadala ba ron og humba unya iyabo ra bisag asa, kan-on sa iro unya madala sa tangkal sa baboy,” matod ni Cortes.
Giangkon ni Mayor Richard Gomez nga bisan sa mga patakaran nga gipatuman, duna gihapon uban nga magpalusot.
“I called for a task force meeting. If ang mga tawo magpadayon sa mga palusot, kani nga problema dili gyod mahuman,” matod sa mayor sa Superbalita Cebu.
Gimando karon sa mayor nga subayon kon kinsa kadtong mga nakapalit og baboy kauban niadtong naigo sa ASF sa Salvacion. (JKDP)