DALAYGON ang plano nga paghatag og libreng supply sa tubig kadtong mga kabus nga konsumedor sa Metropolitan Cebu Water District (MCWD) taliwala sa nag-ung-ong nga dakong kakuwang sa supply sa tubig taliwala sa paspas nga kalamboan sa ekonomiya ug populasyon sa metropolitan area sa Sugbo.
Si Atty. Jose Daluz III, chairman sa Board of Directors (BOD) sa MCWD, maoy nagpasiugda sa plano ug nihangyo kang Mayor Edgardo Labella alang sa P200 milyunes annual water subsidy sa kagamhanan sa dakbayan sa sugod sa tuig 2022 ug pag-uyon sa konseho tungod sa epekto sa mga kabus sa pandemiya sa Covid-19.
Unsay basihanan sa MCWD sa paghatag og libreng tubig? Ang ilang giila nga kabus nga 35 mil ka konsumidor nga adunay konsumo nga wala molapas sa 10 cubic meters kon 50 ka baril o 100,000 liters matag buwan. Sa rason nga tungod sa Covid-19, dili ba tanan ang grabeng naapektohan? Way gipili, adunahan o kabus.
Nasayod kaha sila nga dili tanang ubos og konsumo sa tubig. Dili usab nga dili tanang adunahan nga dako og konsumo sa tubig. Dunay pamilyang kabus nga dako og mahurot nga tubig tungod sa pagdawat og labada o ubang diskarte aron mabuhi. Samtang, dunay adunahan nga minus og konsumo human dili kaayo mapundo sa balay.
Dili kaha pasangil lang ang kakabus ug epekto sa Covid-19? Kon hunahunaon, ang tanan apektado sa pandemiya. Mas maayo nga benepisyo nga buhaton sa MCWD molangkob sa tanan.
Hinuon, si marjority floor leader Raymond Garcia, gitahasan nga mopalabang pa og resolusyon bahin sa naasoy nga plano sa dili pa pirmahan ang memorandum of agreement tali sa kagamhanan sa siyudad ug MCWD. Hinaut nga mokonsiderar sa tukma nga benepisaryo sa libreng tubig.