Nadela: Congrats, mga tinun-an

NAKAGINHAWA nag luag ang uban, apan gihasol pa gihapon sa daghang kakulian ang ubay-ubay nga mga ginikanan ug tinun-an niining pagtapos sa klase sa mga publikong tunghaan. Duna pay daghan ang wa pa makakumpleto og submit sa ilang mga module. May mga requirement nga kuhaonon labi na niadtong transferees. Sa akong bahin, niadtong Biyernes pa nako nakompleto ang Form 138 ug Form 137 nga gipangayo sa eskwelahan nga gibalhinan sa akong anak.

Medyo nadelatar og maayo kini tungod sab sa atong sitwasyon karon. Ang importante nga nakumpleto na ang tanang requirements apil na ang modules nga gikumbati sukad pa niadtong Oktubre sa miaging tuig. Sa akong mahinumduman, usa ka inantigong desisyon ang among giluwatan ni Misis sa dihang naapiki ang pagtuon sa among anak sa iyang eskwelahan kaniadto. Ang maong eskwelahan bisan kong gipadagan sa gobyerno nisagop sa online class.

Tungod sa daghang kakulian nga naglakip sa nag-aginod nga signal sa internet, nakahukom mi nga ibalhin sa usa ka public high school sa among dapit. Giantos ang paghatod-kuha sa module matag semana ug sa miaging semana, natapos ang tanang kahasol. Hasol tungod kay dili sayon ang pagpadayon sa pag-eskwela ning panahon sa pandemiya. Di ko mahibulong nga dunay daghan ang napugos sa pagpaundang sa ilang mga anak sa pagtungha.

Namasin basin kon molurang na ang Covid-19 sa sunod tingklase ug mabalik na ang face-to-face nga klase. Sa akong pagpaniid lisod pa ni nga mahitabo. Pun-an pa nga nagsingabot ang eleksiyon sa sunod tuig, way politiko nga mosugal ug magka kumpormiso kon mapalpak ang face-to-face nga klase, kon ila gyud ning buhaton. Play safe gyud, pulong pa sa mga tactician sa politika.

Pasabot ayaw ipamugos ang isyu sa face to face kon kini moani og di maayong epekto sa kandidatura sa mga naa sa gahum nga gustong managan sa 2022 nga election. Unsa may padulngan ani? Congratulations nalang sa mga tinun-an nga nigradwar, sa mga mosaka sa sunod nga ang-ang ug sa mga ginikanan sa ilang makanunayon nga suporta apil na ang DepEd Family.

Nagkita mi ni Retired Police Officer 3 Cerilo Alburo karong bag-o. Mao ni ang akong nailhan sa karaang panahon nga official photographer sa panahon sa RECOM-7 hangtod na sa pagka Police Regional Office 7. Nasud pagka polis niadtong 1974 ug niretiro pagka 2004. Si Alburo saksi sa daghang panghitabo tungod sa iyang trabaho. Problema sa insurgency, kriminalidad ug daghan pa ang iyang nasugatan gamit ang iyang camera. Daghan siya og gipaambit nga mga kasinatian apan naglabi nga di niya malimtan mao ang mga kulbahinam nga operasyon nga gikinahanglan niya nga kuhaan og hulagway. Karon malipayon na siyang nagpalabay sa panahon sa iyang pinanggang Barangay Casay sa lungsod sa Dalaguete, Cebu.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph