MOKABAT sa 35,000 ka mga residente sa siyudad sa Sugbo nga mga konsumidor sa Metropolitan Cebu Water District (MCWD) ang gipaabot nga makapahimus sa libreng tubig. Alang kini niadtong mokonsumo lang og 10 cubic meters kada buwan.
Si Atty. Jose Daluz III, MCWD chairman, niingon nga ang maong programa sa MCWD magsugod sa buwan sa Hulyo hangtod sa Disyembre ning tuiga. Aprobado na ang maong programa sa hunta direktiba sa MCWD, matod pa ni Daluz.
Matawag kini nga water subsidy sa mga konsumidor kansang gamit sa tubig di mosobra sa 10 cubic meters. Si Cebu City Mayor Edgardo Labella niingon nga usa kini ka paagi sa pagtabang sa mga konsumidor ilabi na sa panahon sa Covid-19 pandemic.
Aron libre, di mag-usik-usik sa tubig aron di mosobra ang konsumo sa 10 cubic meters matag buwan. Kadtong mga konsumidor nga mokonsumo og 11 cubic meters hangtod sa 30 cubic meters magbayad sa basic water rate.
Libre gyud unta ang tubig kay gihatag man kini sa kinaiyahan. Apan nganong pabayron man ta?
Tungod kay gatosan ka milyon ka pesos ang gigasto sa pagkawot sa deep wells, sa pagbutang og dams ug mga tubo aron moabot ang tubig sa atong mga panimalay.
Apan tinuod ba gyud nga libre ang tubig sa mga konsumidor nga nagkonsumo lang og 10 cubic meters kada buwan? Libre para nila. Apan pabayron sa MCWD ang kagamhanan sa siyudad sa Sugbo og P200 milyones.
Inantigo kining maong lakang sa MCWD. Di na maghuot ang mokabat sa 35,000 ka beneficiaries sa maong programa sa ilang buhatan arong mobayad. Usa ray ilang paninglon, ang gobyerno sa siyudad.
Ang P200 milyones nga ibayad sa siyudad, nga isukip sa annual budget sa 2022, gamiton pa gyud sa pag-develop og dugang tinubdan sa tubig alang sa MCWD, matod ni Daluz.
Lakip na niini ang mga busay sa mga bukirang barangay sa Tagbao ug Budlaan.
Gihagoan gyud ni nila sa pagpangita. Si Atty. Frank Malilong Jr., sakop sa board of directors sa MCWD ug kolumnista sa Sun.Star Cebu, nadailos og sobra sa kalima ka higayon sa pagpangita sa tinubdan sa tubig.