MOIHAP sa 1,600 ka mga indibiduwal nga pulos mga empleyado sa gobyerno sa Davao City ug anaa sab sa 1,700 ka mga empleyado sa mga Business Process Outsourcing (BPO) companies sa siyudad sa Davao ang nakadawat na sa unang dose sa bakuna kontra Covid-19.
Sa report, tulo ka adlaw ang gihimong vaccination gikan Hunyo 30 hangtud Hulyo 2, 2021 nga gipangunahan sa Association of Regional Executives of National Agencies in Region 11 (Arena 11).
Ang duha ka mga vaccination hubs nga mao ang University of Southeastern Philippines ug University of the Philippines Mindanao naka-cater og 800 ka mga indibiduwal sulod sa tulo ka adlaw, samtang sa vaccination activity sa Felcris Centrale malampuson sab nga nabakunahan ang pulos nga anaa sa BPO.
Nasayran nga sa pag-abot sa lain na sab nga batch sa bakuna, matigayon na sab ang pagbakuna sa unang dose alang sa mga government employees diin kinahanglan nga magparehistro daan sanglit bawal ang walk-in.
Sa bahin sa BPO, dako ang pasalamat ni BPO Association of Davao Inc. president Eric Manalastas nga suma niya, ang maong higayon usa na ka indikasyon sa hinayhinay nga pagbalik sa ekonomiya di lamang sa Davao City kon di sa kinatibuk-an.
"It was good, as of last night, we have 1,711 vaccinated in three days. It was a volunteer-based vaccination. We have participating companies to send volunteers. We observed in the first and second day, we could do more kasi pinapabilis namin ang process (we hastened the process)," ingon ni Manalastas.
Sa ubang lugar sa nasud halos 60 porsiyento na ang anaa sa BPO nga nakadawat sa unang dose sa bakuna batok Covid-19. (Jeepy P. Compio)