GIPAHIMUTANG ang bandila sa siyudad sa Davao sa "half-mast" gikan Hulyo 5 hangtud Hulyo 9, 2021 isip pagyukbo sa mga sundalo nga namatay human mahagsa ang Philippine Air Force (PAF) C-130 transport plane didto sa Sulu niadtong Dominggo, Hulyo 4.
Sa pamahayag nga gipagawas sa Davao City Information Office, ang lokal nga panggamhanan mipadangat sa iyang "deepest condolences to the families" ngadto sa mga biktima.
"We are also offering our prayers to the survivors. May you find strength and comfort in the millions of Filipinos who share your grief and pain," sumala sa siyudad.
Dugang pang mga patay'ng lawas ang naugkat gikan sa lugar nga nahagsaan didto sa Patikul, Sulu, kon diin misaka na kini ngadto sa 50, sumala sa Joint Task Force (JTF) Sulu sa ilang pinakaulahing katikaran.
Sukad alas 10:30 sa hapon, Dominggo, Hulyo 4, 2021, tanang mga pasahero, piloto ug tripolante naihap na samtang padayon ang pagpangita sa black box sa eroplano.
Apil sa mga namatay mao ang tulo ka sibilyan. Ang uban mga sundalo, naglakip sa piloto ug bag-ong gibansay nga mga miyembro sa Philippine Army kinsa i-deploy na ngadto sa Sulu.
Gisulti sa JTF Sulu nga laing 49 ka mga sundalo ug upat ka mga sibilyan ang naangol.
Nasayran nga alas 10:30 sa gabii niadtong Dominggo, 31 sa naangol nga sundalo gidala ngadto sa Zamboanga City samtang ang 18 gitambalan sa KHTB (Kuta Heneral Teodulfo Bautista) Station Hospital.
Mga namatay sakay sa C-130 military aircraft nga nagkuha sa mga bag-ong nabansay nga sundalo gikan sa Cagayan de Oro City ug mipadulong sa Sulu.
Nasipyat kini sa pagtugpa sa runway ug nahagsa mga 11:30 sa buntag niadtong Dominggo sa Barangay Bangkal sa Patikul.
Gikanayon sa mga nakakita nga daghang mga sundalo milukso sa eroplano una kini mitiurok sa yuta ug mibusikad ug nasunog.
Daling midagsa ang mga sundalo ug mga volunteer nga sibilyan sa lugar alang sa pagpangita ug pagluwas sa mga biktima.