Nagkomedya o tinuoray na gyud nga modagan pagka bise presidente si Presidente Duterte sa Mayo 9, 2022 nga piliay? Atol sa iyang senimana nga programa sa telebisyon sa Malakanyang, iyang gisulti nga modagan siya pagka bise presidente kon duna pay lugar alang kaniya. Matod pa ni Presidente Digong, daghan ang interesado nga modagan pagka bise presidente ubos sa ilang partido, PDP-Laban.
Sa samang programa, iyang gilatigo si Sen. Manny Pacquiao tungod sa gipagawas sa senador nga istorya nga nadoble ang korapsyon sa panggamhanan ni Presidente Duterte. Si Pacquiao, interim president sa PDP-Laban, giplanohan sa pundok ni Energy Secretary Alfonso Cusi, vice chairman sa PDP-Laban, nga palagputon sa partido tungod sa iyang mga komento batok sa administrasyon.
Si Duterte, sa daghang higayon, nagdumili nga modagan pa sa sunod eleksyon tungod sa iyang edad ug matod pa niya gikapoy na siya ug maayo na moretiro. Apan ang pundok ni Secretary Cusi makusganon nga gi-endorso ang kandidatora ni Presidente Duterte pagka bise presidente ug si Senador Bong Go ang ilang kandidato pagka presidente, nga nagsige usab og balibad.
Tungod sa gisulti ni Duterte niadtong Hunyo 28 sa gabii atol sa iyang taho sa katawhan, dunay migawas nga estorya sa social media nga mideklarar na siya nga modagan pagka bise presidente, apan gihimakak kini sa Malakanyang. Matod pa ni Presidential Spokesman Harry Roque agi’g subli sa gisulti ni Duterte nga iyang “gitugyan na sa Diyos”.
Daghan na ang gi-endorso sa administrasyon nga kandidato pagka bise presidente sa PDP-Laban. Niadtong Hunyo 16, gi-endorso ni Presidente Duterte si Cong. Martin Romualdez, nga modagan pagka bise presidente sa iyang anak nga si Davao city Mayor Sara, nga desidido na nga modagan pagka presidente ubos sa iyang Partido Panaghugpong. Si Congressman Romualdez pag-umangkon ni kanhi First Lady Imelda R. Marcos.
Karon, ang pundok sa PDP-Laban nabungkag tungod sa plano ni Senador Pacquiao nga modagan pagka-presidente sa sunod nga piliay. Gani, sa kumbensyon sa PDP-Laban wa gilakip si Pacquiao nga ilang interim president sa Partido ug tungod sa gibulgar ni Senador Pacquiao nga daghan gihapon ang korapsyon sa administrasyon ni Presidente Duterte.
Matod pa ni Pacquiao, dili angay masuko si Duterte kay igo ra siya nga mitabang sa iyang administrasyon. Atong mahinumduman nga giawhag ni Presidente Duterte si Pacquiao paghatag og ebidensya sa mga korap nga ahensya sa gobyerno ug siya na ang moimbestigar. Apan nausab ang tuno sa presidente kay si Pacquiao na iyang paimbestigahon karon.
Gibirahan sa Presidente si Pacquiao nga tungod kay pirmi siya absent sa Senado, wala siya makahibawo nga human na nga gisusi ang isyu sa korapsyon batok sa Department of Health.
Apan gisawo ni Senate Blue Ribbon Committee chairman Dick Gordon nga mahimo ra sila moimbestigar sa mga ahensya sa kagamhanan nga gihinganlan ni Pacquiao nga dunay isyu sa korapsyon bisan kon tua na siya sa California karon kay nag-ensayo alang sa iyang boksing sa sunod buwan.