Ang Cebu Provincial Board miaprobar sa resolusyon nga naghanyo sa Inter-Agency Task Force nga gahinan og pundo ang pag-quarantine sa mga returning overseas Filipinos (ROF) sa mga hotel.
Ang hangyo maoy unod sa resolusyon nga giduso ni Bokal John Ismael Borgonia ug giaprobahan sa session sa Lunes, Hulyo 5, 2021.
Matod ni Borgonia nga pagpahihumdom kini sa saad sa nasudnong kagamhanan kalabot sa ilang saad alang sa mga ROF.
Ang protocol sa National IATF ug ordinansa sa Lalawigan sa Sugbo nagkalahi sa swab test ug kadugayon sa quarantine sa mga hotel.
Samtang i-quarantine ang mga ROF og 10 ka adlaw sa mga hotel base sa guidelines sa NIATF, ang Kapitolyo mopagawas gilayon sa mga ROF ug overseas Filipino workers sud sa duha ngadto sa tulo ka adlaw kon magnegatibo sila sa swab test sa ilang pag-abot sa Mactan Cebu International Airport (MCIA).
Sa ikapito na usab ka adlaw i-swab test ang ROF ug OFW, apan sa Lalawigan sa Sugbo, himuon kini sa pag-abot ug sa ikapitong adlaw sa ilang local government unit (LGU) diin sila i-quarantine sa ilang pag-abot gikan sa hotel.
“Unlike OFWs, whose quarantine accommodation expenses are shouldered by the Overseas Workers Welfare Administration (Owwa), the IATF-MEID’s 10-day hotel based quarantine policy causes distress and undue financial burden on the Returning Overseas Filipinos, since they have to pay for their 10-day hotel quarantine fees, of which the money could have been used for other necessary purposes,” gisaysay sa resolusyon ni Borgonia.
Niadtong Hunyo 29, gipahigayon ang special session diin gihangyo ni Cebu Governor Gwendolyn Garcia ang IATF nga hatagan og kahigayonan ang Lalawigan sa Sugbo nga moduma sa kaugalingong mga konstituente niini, pinaagi sa pagpatuman sa ordinansa nga gipasar.
Apan bisan pa niini, napakyas ang Probinsya sa pagpatando sa IATF sanglit hugot ang baruganan niini sa pagpatuman sa lagda o resolusyon sa IATF alang sa mga mopauli.
Gibutyag ni Borgonia nga sa kasamtangan ang mga ROFs gihapon ang nagbayad sa quarantine hotel niini. (ANV)