Ang Cebu City Government nitugot na nga makabalik ang 600 ka mga sidewalk vendor sa mga eskinita nga lapad sa Lunes, Hulyo 5, 2021.
Apan anha ra sila makatinda sa mga eskinita nga dunay di mominus 2.5 metros ang gilapdon.
Kini subay sa girekomendar sa Garbo Asenso Sumbanan Alyansa (Gasa) nga pabalikon sila apan ngadto ra sa mga lugar nga adunay sidewalk nga lapad.
Si Konsehal Renato Osmeña Jr., chairman sa committee on markets sa Konseho, nanawagan ngadto sa mga vendor nga mosunod sa mga lagda sa Gasa.
Ang Gasa maoy nag-regulate sa ilang pagpaninda aron usab dili masakripisyo ang publiko.
“Nagsuroy ug nagtan-aw mi sa mga sidewalk vendors kon nagsunod ba sila sa mga sizes sa stores ug naa ba sila sa designated area. Ug nagpasalamat mi nga wa magpabadlong ang mga vendor at the same time lipay sila nga nakabalik na,” padayag ni Osmeña.
Ang pangulo sa Probe, Raquel Arce, niingon nga dili na sila mang-embargo og tinda para ngadto sa mga violator, inay kuhaon nila ang mga identification (ID) card niini sanglit ilang gipatuman ang “no ID, no vending” policy.
Ang pagpabalik sa mga vendor nga gisugdan sa niaging adlaw gihangop sa pangulo sa Cebu City United Vendors Association (Ccuva), Maria Pino, sanglit mahatagan na og desenting panginabuhian ang gatusan ka mga vendor nga maoy ilang naandan ug gisaligan.
Ang pangulo sa Cebu City Transportation Office (CCTO) nga si Lyntoni Alburo nanawagan sa mga stall owner ug mga pumapalitay nga dili ibilin ang ilang mga motorsiklo sa sidewalk aron dili makabalda sa pedestrian ug di ma-tow ang ilang sakyanan.
Sa kinatibuk-an, gihulagway nilang Osmeña nga hapsay ug hamugaway gihapon ang Colon, Osmeña Bouevard ug Magallanes, diin nibalik og paninda ang mga vendor gikan sa Biyernes, Sabado, Dominggo ug Lunes sugod sa alas 9 sa buntag hangtod alas 10 sa gabii.
Ang paghawan sa mga sidewalk gikan sa vendors gipatuman sa Department of the Interior and Local Government (DILG) niadtong 2019 human si Presidente Rodrigo Duterte nga ibalik kini sa katawhan.