Lalake nga 2 anyos namatay human maanod sa baha sa sapa atol sa pagbunok sa uwan niadtong Sabado sa alas 2:30 sa hapon, Hulyo 3, 2021 sa Brgy. Tubod Dungoan, lungsud sa Dumanjug, Sugbo.
Si Elia Kim Espraguera patay nang niabot sa tambalanan.
Si Police Master Sgt. Ian Joseph Arapoc sa Dumanjug Police Station nga nahinabi sa Superbalita Cebu nagkanayon nga ang inahan nga si Edelyn nilakaw kay nagbalhin sa gitugway nilang kabaw.
Wala diha ang iyang bana nga Si Raymond kay nitrabaho. Sa wala pa siya molakaw, iyang gibinlan ang mga bata og pagkaon.
Kusog na ang pagbunok sa uwan niadtong higayuna ug nisugod na sa pagsuyla ang tubig sa sapa sa ilang lugar.
Nagdali siyag labang aron mabalhin pagtugway ang kabaw, apan wa siya masayod nga ang iyang 2 anyos nga anak niapas kaniya. (GPL)