USA sa among mga suking tigpaminaw sa dxGO Aksyon Radyo Davao ni-text namo (Alger ug Jhun Ociones Suter) labot sa iyang komento sa nakuha nga degree ni Senador Manny Pacquiao.
Suma niya: "Maayong buntag, Aksyon Alger ug Jun. Si Melchor ni sa Toril. Ako lang ipadayag ang akong opinion sa politika. Akong nakita man gud sa social media nga gikwestiyon ni Pastor Quiboloy si Senator Manny Pacquiao nganong iya rang gihuman iyang kurso sulod sa tulo ka bulan. Kung mao, hawsyaw diay nang pagkaeskwelaha? Di maayo nga atong isalig ang nasud sa tawo nga walay kabangkaagan ug bakakon, suma pa ni President Duterte. Salamat sa inyong pagtagad."
Human gibasa ni Aksyon Jun ang maong mensahe, among gi-usa-usa og tubag ang iyang punto.
Una, akong gitubag nga ilawom sa 1987 Philippine Constitution, ang kuwalipikasyon sa usa ka President mao lang ang: a) natural-born citizen sa Pilipinas; b) rehistradong botante; c) makamao nga mobasa ug mosuwat; d) 40 anyos ang edad sa adlaw sa eleksyon; ug e) residente sa Pilipinas sud sa napulo ka tuig una ang eleksyon.
Kon Konstitusyon ang atong basehan, aw, kwalipikado ang si bisan kinsa, ilabi na gyud ni Pacquiao.
Ikaduha, akong gipaklaro nga di hawsyaw o peke ang iyang nahuman nga degree sanglit duna may Expanded Tertiary Education Equivalency and Accreditation Program (ETEEAP) ang mga awtorisado nga universidad sa nasud.
Hinuon, kung hisgutan ang isyu sa pagtugot sa Commission on Higher Education (Ched) ngadto sa University of Makati (UMak) sa pagtanyag sa maong programa, ang Ched ra gyud ang makatubag niana.
Apan, suma sa akong nasayran, ang ETEEAP sa UMak uban kini sa pagbuligay sa Philippine Councilors League-Legislative Academy (PCCLA) nga nagtabang sa ilang mga miyembro nga elected officials nga mahuman sa ilang degree.
Nangong daling nahuman si Pacquiao? Kini tungod kay sa ETEEAP dunay equivalent ang kasinatian ug mga training certificates nga natambongan sa usa ka aplikante.
Tungod kay si Pacquiao dugay na nga Kongresista ug Senador, nan, tataw kaayo nga nakat-onan na niya ang mga subjects nga gitudlo ngadto sa regular nga estudyante sa kursong Political Science.
Ug sanglit hanas na man siya sa iyang trabaho sa political office, mahimong di na niya i-enrol ang mga subjects sama sa Fundamentals of Political Science, Introduction to Philippine Politics and Governance, Philippine Public Administration, Parliamentary Procedures, Philippine Foreign Relations, Introduction to International Relations, ug Philippine Political Parties.
Gani, dunay mga higala nako nga political appointees ni Pangulong Rodrigo Duterte nga nigraduwar sa ilang degree pinaagi sa ETEEAP. Nganong nasayod ko niini? Kini tungod kay nagsilbi ako nga industry evaluator sa ETEEAP program sa usa ka universidad dinhi sa Mindanao.
Kon peke man ugaling ang programa nga maoy nakapahuman ni Pacquiao, aw, peke sab diay ang nakuha nga degree sa mga nailhan nako nga mga konsehal ug kongresista sa sa Davao Region?