SIGNIT sa kapulisan sa Mandug Police Station sa Davao City ang usa ka giingong glass installer human kini namaligya og gidudahang shabu sa nagtakuban nga kapulisan alas 12:30 sa hapon, Hulyo 5, 2021, sa Barangay Sasa, Davao City.
Si Police Major Jerome De Guzman nag-ila sa suspek nga si Kenny Amper alyas Gaw, 38 anyos, taga Catalunan Pequeño, Tugbok District, Davao City.
Sumala ni Major De Guzman nga napalitan sa ilang poseur buyer ang suspek og usa ka pakite sa gituohang shabu kantidad og P6,000.
Dugang sa hepe sa Mandug, gawas sa P6,000 nga shabu, nakuha sab sa posisyon sa suspek ang laing 50 grams ang gidaghanon sa mga ilegal nga druga kantidad og P800 mil.
Giandam na sa kapulisan ang kasong pagsupak sa Republic Act 9165 kon Comprehensive Dangerous Drug Act of 2002 batok sa suspek didto sa korte. (Jeepy P. Compio)