NAHAGBA sa gitindogan ang usa ka pulis nga sakop sa Davao De Oro Provincial Drug Enforcement Unit human gipusil-patay sa wa pa mailhing mamumuno alas 12:11 sa udto didto sa Purok 14, Barangay Poblacion, Nabunturan, Davao de Oro.
Si Police Major Jesser Vagilidad IV, hepe sa Nabunturan Municipal Police Station, nag-ila sa biktima nga si Police Corporal Rex Emuy, 42 anyos, taga Purok 7, Barangay Maparat, Compostela, sa nahisgutang probinsiya.
Ang biktima nakahiagom og mga samad pinusilan sa nagkadaiyang parte sa lawas nga maoy hinungdan sa iyang kamatayon.
Nasayran nga nagtindog ang biktima sa usa ka auto repair shop dihang usa ka wa mailhing lalaki ang miabot dayon gipusil ang biktima.
Mikaratil dayon og sibat ang mamumuno, samtang ang kapulisan padayong naghimo og makuting imbestigasyon aron mailhan ang mga suspek ug matumbok ang motibo sa krimen.