Beterano, knockout artist ug one-time world title challenger ang makontra ni Mark “Magnifico” Magsayo sa undercard sa away nila ni Manny Pacquiao ug Errol Spencer Jr. sa Agusto 21, 2021 sa T-Mobile Arena sa Las Vegas, Nevada.
Si Julio Ceja sa Mexico, kinsa adunay 32 ka daog, 28 niini gipang-knockout, upat ang pildi, maoy mosuway sa katakos sa batan-ong Magsayo, kinsa wala pay pildi sulod sa 22 ka away nga may 15 ka knockouts.
Ubos sa ranking sa World Boxing Council (WBC), si Magsayo, kinsa giugmad karon sa MP Promotions ni Pacquiao, nalista sa ikalimang puwesto samtang si Ceja anaa sa ika-11 sa featherweight division.
Naila si Ceja sa iyang pagka do-or-die fighter nga dili moatras nga daw og mosugot lang kon si kinsay matumba.
Gani sa upat ka pildi niini, katulo sab siya ma-knockout lakip na ang pagkapildi sa Cuban fighter ug kanhi world champion nga si Guillermo Rigondeaux niadtong 2019 diin siya gipaundang sa referee sa ikawalo ka round human kini maigo sa solidong left hook nga maoy nakapahagba kaniya.
Sa uwahi niyang away sa Nobiyembre 2019 alang sa nabakanteng world title batok ni Brando Figueroa (20-0, 17KOs), si Ceja nakapakita og impresibong kombati nga miresulta hinuon sa majority draw.
Kini maoy magsilbing agianan ni Magsayo paduol sa iyang damgo nga makaaway alang sa WBC world title nga sa kasamtangan gihuptan ni Gary Russell Jr (31-1, 18KOs).
Ang kanhi sakop sa ALA Boxing Gym uban sa iyang asawa nga si Francis, atoa na nagbasehan sa Estados Unidos ubos sa paggiya sa inilang boxing trainer nga si Freddie Roach diin iyang gikauban ang Pambansang Kamao nga si Pacquiao.
Kini maoy ikatulong away ni Magsayo sa Amerika diin sa labing ulahi, iyang gi-knockout si Pablo Cruz sa ikaupat nga round sa Abril 10, 2021.