Giuyonan sa mga tag-iya sa yuta nga palapdan hangtod 20 metros ang karsada gikan sa barangay Talamban gym paingon sa taytayan nga nag-uwang tali niini ug sa Barangay Bacayan, Dakbayan sa Sugbo.
Kini ang gipadayag ni Councilor Jerry Guardo, chairman sa committee on infrastructure sa City Council, atol sa gipahigayon nga konsultasyon kagahapon sa buntag uban sa apektadong mga tag-iya.
Si Guardo nagkanayon nga tinguha ni Mayor Edgardo Labella nga palapdan ang karsada aron mahimong 20 metros ang gilapdon sa ingon tagduha na ka lanes ang matag habig.
“All lot owners (who are) present interpose ‘no objection’ to the proposed road widening project and expressed full support and cooperation,” padayag ni Guardo sa mga tigbalita.
Ang chairman sa committee on infrastructure niingon nga 80 porsyento sa mga affected lot owners nanambong sa iyang gipatawag nga public consultation uban sa mga representante gikan sa City Budget Office, City Accounting Office, Department of Engineering and Public Works (DEPW), Division for the Welfare of the Urban Poor ( DWUP), City Legal Office, City Assesor’s Office ug Verdida Geodetic Engineering.
Ang konsehal sa north district nagkanayon nga sa pagkakaron, tag-usa pa ka lane ang karsada hinungdan nga dali ra mapuno sa mga sakyanan hilabi na kon adunay disgrasya.
Dugang ni Guardo nga kon mapatuman na ang proyekto, dako og ikatabang sa traffic problem sa lugar diin nagkadaghan ang mga sakyanan.
Ang karsada nga naglagbas gikan sa Talamban gym agi sa Barangay Bacayan padung sa Barangay Pit-os, wa mapalapdi sukad sa dekada 70.
Ang tulo ka mga barangay dunay nay daghang subdivisions, ingon man mga tunghaan, sama sa Cebu International School (CIS).
Gawas niini, ang karsada mao usab ang giagian karon sa dagkong trucks nga nanghakot og mga filling materials gikan sa kabukiran sa Dakbayan sa Sugbo.
Naa sab usab nangagi ang tanang mga trak sa basura sa Dakbayan sa Mandaue ug Cebu City nga molabay sa mga sagbot ngadto sa landfill sa Barangay Binaliw.
Mga lumolupyo sa Barangay Pulangbato, Binaliw ug uban pang mga bukirang dapit sa north district sa Dakbayan sa Sugbo mag-agian sab sa dos kilometros kapin nga karsada.
Ang plano sa pagpalapad sa karsada niadto pang dekada 90, apan human sa 30 ka tuig, wa gihapoy nahitabo.