Ikatulong wanted sa pagpatay sa usa ka pastor nadakpan sa kapulisan alas 10:55 sa buntag sa Martes, Hulyo 6, 2021 sa Sitio Ilaya, Brgy. Talamban, Dakbayan sa Sugbo.
Si Abito Encarnacion Lañojan, 30, minyo, construction worker, nagpuyo sa nahisgutang lugar, nasikop sa Anti-Kidnapping Group- Visayas Field Unit (AKG-VFU) pinanguluhan ni Police Lt. Zosimo C. Ravanes Jr., uban sa mga sakop sa Dumanjug Police Station, ug ni Kapitan Dario B. Arcilla sa Talamban.
Ang warrant of arrest sa kasong murder giisyu ni Judge Anabelle Robles, assisting judge sa Regional Trial Court (RTC) Branch 69 sa lungsod sa Barili, Cebu, gipitsahan og Hunyo 24, 2021.
Si Abito manghud nila ni Pastor Daniel ug Miguel Lañojan, kinsa unang nasikop nila ni dakoan sa AKG-VFU 7, niadtong Hulyo 1, 2021 sa Brgy Pakigne, lungsod sa Minglanilla.
Sila maoy gitumbok nga mipusil patay kang Pastor Celerino Encarnacion Marco, niadtong Septiyembre 13, 2020 sa Brgy. Liong, Dumanjug.
Si Ravanes nga nahinabi sa Superbalita Cebu nagkanayon nga nagtago-tago si Abito human nahibaw-an niya nga nasikop ang iyang mga maguwang.
Apan sa gihimong follow up sa AKG-VFU ug Dumanjug Police, ilang natultolan si Abito.
Ang managsuon ug si Marco duna nay daang panagsungi sa didto pa sila sa Negros Oriental, matod sa pulis. (GPL)